Dárigersiz jasalǵan em-domnyń saldarynan qaraǵandylyq bala es-tússiz jatyr
QARAǴANDY. QazAqparat - Qaraǵandydaǵy balalar aýrýhanasynyń jan saqtaý bóliminde sýyq tıip qalǵan soń kórshi kelinshek dári egip, saldarynan es-tússiz qalǵan eki jasar bala bes kúnnen beri komada jatyr, dep habar beredi «QazAqparat» HAA tilshisi.
«Ókinishke qaraı, bala áli jansaqtaý bóliminde jatyr, oǵan jasandy tynys alý apparaty jalǵanǵan», - deıdi Qaraǵandy oblystyq densaýlyq saqtaý basqarmasynyń baspasóz hatshysy Aıjan Isa.
Dárigerler balanyń qaıǵy shegip otyrǵan anasyn aıyptamaýdy suraıdy. Balaǵa jazda qoly synǵandyqtan eki ret ota jasalǵan. Dál osy Tsef-3 preparatyn dárigerler bala palatada jatqanda da ekken, ol kezde balada allergııa baıqalmaǵan.
Úshinshi qyrkúıekte sheshesi sýyq tıgen balany ózi emdemek bolyp, dárihanadan osy preparatty satyp alǵan. Al dárini balaǵa kórshi kelinshek egip bergen.
«Ókinishke qaraı, kóptegen ata-analar dárigerdiń nusqaýynsyz antıbıotıkterdi egedi nemese ishkizedi. Bulaı etýge bolmaıdy, - deıdi oblystyq balalar klınıkalyq aýrýhanasynyń emdeý jumystary jónindegi bas dáriger orynbasary Nına Derkach. - Antıbıotıkter naqty taǵaıyndaýdy talap etedi. Eger balanyń birer dárige allergııasy bolmasa, keıinnen túrli faktorlardyń áserinen jaǵdaı ózgerýi múmkin».
Eske sala keteıik, úshinshi qyrkúıek kúni 17:45-te bala oblystyq klınıkalyq aýrýhanaǵa klınıkalyq ólim jaǵdaıynda jetkizilgen. Oǵan dári ekkennen keıin bala eseńgirep, es-tússiz qalǵan. Qazir ol komada jatyr.
Keń qoldanystaǵy Tsef-3 (tseftrıakson ) preparaty dárihanalarda retseptisiz beriledi.
