Dárigerlermen birge patsıentterdiń de jaýapkershiligin aıqyndaý kerek - Birtanov
«Elimizde medıtsınalyq kómek kórsetý turǵysynan óte salmaqty saýaldar týyndap jatady. Ásirese, ortaq jaýapkershilikke qatysty suraqtar bar. Ókinishke qaraı, ártúrli medıtsınalyq kómek kórsetý túrleri nemese dıspanserleý jumysy medıtsınalyq qyzmetkerlerdiń mindettemeleri men belgili bir standarttarǵa negizdelip qalǵan. Demek, patsıent tarapynan eshqandaı mindetteme kerektigin eskere bermeımiz. Bul durys emes, sebebi bul kózqaras patsıenttiń jaýapkershiligin tómendetedi. Patsıent ýaqytyly dıspanserleýge qatyspaıdy, der kezinde dárigerge júginbeıdi. Osylaısha, syrqat asqynyp ketkende ǵana qaralyp jatady. Menińshe, buny statıstıka da dáleldep bere alady», - deıdi mınıstr.
Eljan Birtanovtyń aıtýynsha, qazirden bastap «patsıentterdiń jaýapkershiligi qaıda?» degen suraqqa jaýap tabý kerek.
«Kóptegen mysaldardy alýdyń qajeti joq. El arasynda kóptep kezdesetin 2-3 aýrýdyń túrin, máselen qant dıabeti, júrek-qantamyrlary men onkologııalyq aýrýlardy saraptaı otyryp, patsıentterdiń óziniń jaýapkershiligi qaıda dep suraq qoıýymyzǵa bolady. Osy sebepti, biz bul máselege zańnamalyq turǵyda jaqyndaýymyz kerek. Usynystarymyz bar. Sebebi, ortaq jaýapkershilikti kúsheıtpeı, qoǵamdyq densaýlyq saqtaý salasyn damytý múmkin emes», - deıdi Eljan Birtanov.
Mınıstr kópshiliktiń bul baǵyttaǵy jumysqa qoldaý bildiretirine senim bildirdi.
«Bul tek qana mindetti medıtsınalyq saqtandyrý aıasyndaǵy qarjylyq jaýapkershilik qana emes, basym jaǵdaıda aýrýdyń profılaktıkasy, ár adamnyń óziniń syrqatyna baqylaý júrgizý boıynsha jumys. Eń aldymen patsıentterdiń múddesi úshin jasalyp otyrǵandyqtan, kópshilik atalǵan baǵyttaǵy jumysymyzdy qoldar degen senimdemiz», - dep túıdi mınıstr.
Aıan Bekenuly
