Dárigerlerge shlagbaýmdar men aqyly lıftter kedergi keltiredi – ákim
NUR-SULTAN. QazAqparat – Medıtsınalyq qyzmetkerler kómek kórsetýge barǵan kezde shlagbaým, arnaıy kartochkany qajet etetin aqyly lıftter kedergi keltiretinin aıtady. Bul týraly Nur-Sultan qalasy ákimi Altaı Kólginov halyqqa esep berý kezdesýinde aıtty, dep habarlaıdy QazAqparat tilshisi.
«Sońǵy 20 jylda adamnyń ortasha ómir súrý uzaqtyǵy 10 jylǵa uzardy. 2000 jyldyń basynda ortasha ómir súrý uzaqtyǵy 65 jas bolsa, qazirgi ýaqytta 76 jasqa uzarǵan. Bul ómir sapasynyń jaqsarǵandyǵynyń belgisi. Al qaladaǵy jaǵdaıǵa keletin bolsaq, densaýlyq saqtaý nysandaryna aıtarlyqtaı salmaq túsýde. Byltyr 12 obekt ashtyq jáne onyń sany kóbeıe beredi. Memlekettik baǵdarlama boıynsha salynǵan úılerdiń birinshi qabatynda osyndaı obekt ashatyn bolamyz. Ýálıhanov kóshesindegi úıdiń birinshi qabatynda ashylǵan sııaqty Uly dala jáne Beısekov kóshesindegi úılerdiń birinshi qabatynda emhana, ońaltý ortalyǵy, shaǵyn ortalyq jáne ýchaskelik polıtsııa pýnkti ashylady», - deıdi Altaı Kólginov.
Ol medıtsına qyzmetkerleri nege shaǵymdanatynyn aıtty.
«Medıtsınalyq qyzmetkerler jedel medıtsınalyq kómek kórsetýge barǵan kezde shlagbaým, arnaıy kartochkany qajet etetin aqyly lıftter kedergi keltiretinin aıtady. Biz naýqasqa kedergisiz jetý úshin jaǵdaı jasaýymyz kerek. Ortalyq temirjol aýrýhanasy apatty jaǵdaıda. Onyń qasyndaǵy áskerı emhanaǵa jóndeý jumystaryn júrgizip, jyl basynda osy aýrýhanany sonda kóshirdik. Bul máseleni túbegeıli sheshý úshin ınvestorlardy tarta otyryp, memlekettik jeke seriktestik boıynsha Saryarqa aýdanynda kópsalaly jańa aýrýhana salmaqpyz», - deıdi ol.
