Dárigerlerge salmaǵy 500 keli patsıentti aýrýhanaǵa jetkizý úshin arnaıy qural qajet boldy
ASTANA. QazAqparat - Meksıkadaǵy Agýaskalıentes qalasynyń dárigerleri salmaǵy 500 keli tartatyn patsıentti aýrýhanaǵa jetkizý úshin arnaıy quraldardy paıdalanýǵa týra keldi.
Bul týraly interfax.ru EFE agenttigine silteme jasap habarlady.
32 jastaǵy Hýan Pedro Franko alty jyldan beri tóseginen kóterile almaıdy. EFE málimetterine qaraǵanda, áńgime álemdegi eń semiz adam jaıly bolyp otyr.
Patsıenttiń ómirine qaýip tónbesi úshin on adamnan quralǵan top: dárigerler, sanıtarlar jáne reanımatologtar jumys istedi.
Frankony aýrýhanaǵa jetkizý úshin bir tonnadan astam júk kóteretin kólikti paıdalanýǵa týra kelgen.
Budan basqa, onyń týystary Frankonyń temir symdarmen bekitilgen, arnaıy tutqa men ilmek ornatylǵan arnaıy tósegin buzyp birge artý úshin ter tógýge týra keldi.
Medıtsınalyq mekemeniń ókili Gabrıela Senteno keshe Gvadalaharǵa jetkizilip, qan analızin tapsyrǵanyn aıtty. Onyń sózine qaraǵanda, patsıent Gvadalaharda birneshe aı boıy jatyp, emdeledi.
Jeke klınıkada dárigerler Frankonyń artyq salmaǵynan arylýyna kómektespek. Mamandar alty aıdyń ishinde Franko dıeta otyryp jáne terapııanyń kómegimen 40 keli tastaıdy degen senimde. Sodan keıin ǵana ota jasalatyn bolady.
Ol týǵan kezde salmaǵy 3,7 keli bolǵan. Jyl saıyn 10 keliden qosyp otyrǵan. Al 17 jasynda onyń salmaǵy 230 kelige jetken.
