Dárigerlerge kóńili tolmaıtyn qyzylordalyqtar qaıda shaǵymdana alady
QYZYLORDA. QazAqparat-Qyzylorda oblysynda medıtsına salasynyń qyzmeti men sapasyna kóńili tolmaǵan turǵyndar endi 23-70-22 senim telefony arqyly shaǵymdana alady. Bul týraly búgin Óńirlik kommýnıkatsııalar qyzmetinde ótken baspasóz máslıhatynda oblystyq qoǵamdyq densaýlyq saqtaý departamentiniń basshysy Ulbolsyn Ahaneva málimdedi. Bul týraly QazAqparat tilshisi habarlady
Jyl basynda tutynýshylardyń quqyqtaryn qorǵaý departamenti oblystyq qoǵamdyq densaýlyq saqtaý departamenti bolyp qaıta tirkeldi. Nátıjesinde, sala mamandary attestatsııadan ótkizildi. Medıtsınalyq qyzmettiń sapasyn jaqsartý jáne qyzmet kórsetý úshin bólimder ashyldy. Sonymen birge, memlekettik qyzmettiń 7 túri usynylyp, jumystar atqarylýda.
«Bizdiń mekeme tek qana juqpaly aýrýlardy ǵana emes, somatıkalyq aýrýlarǵa qatysty aldyn alý jumystaryn úılestiredi, aqparattandyrady. Sonymen qatar, emhanalar men aýrýhanalarda medıtsına qyzmetiniń sapasyna kóńili tolmaǵan turǵyndar dárigerler tarapyna aryzdary bolsa, jańadan ashylǵan bólimge habarlasyp, shaǵym jasaı alady. Senim telefonymyz jumys jasaýda. Biz óz kezegimizde máseleni zerttep, jaýabyn beremiz», - dedi Ulbolsyn Ahanaeva.
Baspasóz máslıhatynda egý jumystary jaıy da sóz boldy. Bıyl tumaýǵa qarsy 78 myń vaktsına satyp alý úshin qarjy qaralǵan. Egý jumystary 15 qazannan bastalady.
