Dárigerlerge 73,7 mlrd teńgeden astam ústemaqy tólendi - Bolat Tókejanov

NUR-SULTAN. QazAqparat – Áleýmettik medıtsınalyq saqtandyrý qory epıdemııaǵa qarsy is-sharalarǵa tartylǵan medıtsına qyzmetkerleri men mamandarǵa ústemaqy tóleýdi jalǵastyrýda. Bul týraly osy qordyń basqarma tóraǵasy Bolat Tókejanov málim etti, dep habarlaıdy QazAqparat tilshisi.

«Qor epıdemııaǵa qarsy is-sharalarǵa tartylǵan medıtsına qyzmetkerleri men mamandarǵa ústemaqy tóleýdi jalǵastyrýda. Naýryz-tamyz aılarynda 73,7 mlrd teńge kóleminde ústemaqy tólendi», - dedi Tókejanov Ortalyq kommýnıkatsııalar qyzmetinde.

Onyń sózine qaraǵanda, tamyz aıynyń qorytyndysy boıynsha Qor COVID-19, vırýstyq pnevmonııamen kúreske tartylǵan 66 myń medıtsına qyzmetkerine 17 mlrd teńgege jýyq ústemaqy tóleıdi.

Ol QR Densaýlyq saqtaý mınıstrliginiń jańa buıryǵyna sáıkes, medıtsına qyzmetkerleriniń tizimi keńeıgenin eske saldy.