Dárigerlerdiń jalaqysyna qosymsha tólenetin ústemeaqyǵa qansha qarjy bólindi
Áleýmettik tólemderdi aı saıyn Áleýmettik medıtsınalyq saqtandyrý qory tóleıdi.
«Qordyń medıtsına qyzmetkerleri aldyndaǵy barlyq mindettemelerdi tolyq jáne ýaqtyly oryndalatynyn atap ótkim keledi. Bıyl naýryz-tamyz aıy aralyǵynda 73,7 mlrd teńge kóleminde ústemaqy tólendi. Qyrkúıektiń qorytyndysy boıynsha 40 myńnan astam medıtsına qyzmetkeri 10,1 mlrd teńge kóleminde ústemaqy alady. Qazir óńirlik komıssııalar ústemaqy alýshylardyń tizimin jasaqtaýda. Tizim daıyn bolǵannan keıin Qor aı saıynǵy qosymsha aqy tóleýge kirisedi. Bul jumysty 15 qazanǵa deıin aıaqtaýdy josparlanyp otyr», - dedi Tókejanov Ortalyq kommýnıkatsııalar qyzmetinde.
Onyń sózine qaraǵanda, ınfektsııa taraǵan qaýipti jaǵdaıda jumys istegen medıtsına qyzmetkerleriniń sany epıdemıologııalyq jaǵdaıǵa baılanysty aı saıyn ózgerip otyrady. Eger naýryzda koronavırýsqa qarsy jumys isteýge 19 myń medıtsına qyzmetkeri tartylsa, shildede olardyń sany 79 myńǵa jetti.
Táýekel tobyna qaraı medıtsına qyzmetkerleri 212 myń teńgeden 850 myń teńgege deıin qosymsha aqy alady.
Aıta keteıik, Memleket basshysy COVID-19-ǵa qarsy kúres aıasynda epıdemııaǵa qarsy is-sharaǵa tartylǵan densaýlyq saqtaý uıymdarynyń qyzmetkerlerine osy jyldyń ekinshi jarty jyldyǵynda yntalandyrý retinde ústemaqy tóleýge 150 mlrd teńge bólýdi tapsyrdy.
Qor jyl sońyna deıin medıtsına qyzmetkerlerine ústemaqy tóleý úshin qajetti qarjynyń boljamdy esebin júrgizdi, shamamen 135 mlrd teńge qajet.
Buǵan deıin habarlanǵandaı, QR DSM Taýarlar men kórsetiletin qyzmetterdiń sapasy men qaýipsizdigin baqylaý komıtetiniń tóraǵasy Tımýr Sultanǵazıev medıtsına qyzmetkerlerine tólem jasaý máselesine qatysty túsinik berdi.
