Dárigerlerdiń jalaqysy 10-15 paıyzǵa kóteriledi
«Qazirgi kezde densaýlyq saqtaý salasyna shamamen 1 trln teńge bólinedi. Sonyń 40 paıyzy jalaqyǵa jumsalsa, týra sondaı aqsha medıtsınalyq preparattardy satyp alýǵa ketedi. Al qalǵan 20 paıyzy - dárigerlerdi oqytýǵa ketetin aqsha jáne ákimshilik shyǵyndar. Mine, sol ákimshilik shyǵyndardy azaıtýdyń esebinen jalaqyny kóterýge múmkindik bar. Mysaly, bizde bir aýrýxananyń ornyna tórt aýrýxanany salyp tastaǵan. Tórt bas dáriger, segiz orynbasary, esepshiler qanshama. Al aýrýxanalardy biriktirip, kópbeıindi keshenderdi qurý arqyly ákimshilik shyǵyndardy qysqartýǵa bolady. Iá, bas dárigerler azaıady. Degenmen, xalyqqa yńǵaıly bolady. Dárigerlerdiń jalaqysy da kóteriledi», - dedi Birtanov búgin QR Prezıdenti janyndaǵy Adam quqyqtary jónindegi komıssııanyń keńeıtilgen otyrysynda.
Mınıstrdiń aıtýynsha, ákimshlik personaldy biriktirýdiń arqasynda jylyna shamamen 10 mlrd teńgeni únemdep otyrýǵa bolady. Sonyń esebinen dárigerlerdiń jalaqysyn 10-15 paıyzǵa kóterýge múmkindik bar.
«Árıne, bunyń barlyǵyn birden iske asyrý múmkin emes. Sondyqtan biz arnaıy jospardy jasap, 2025 jylǵa deıin osy saladaǵy jumysty bitindep atqaratyn bolamyz. Budan bylaı jergilikti bılik te bólek-bólek emes, bir jerde shoǵyrlanǵan kópbeıindi aýrýxanalardy salýǵa den qoıýy qajet», - dep atap kórsetti Eljan Amantaıuly.
Onyń sózine qaraǵanda, jalaqyny arttyrýdyń taǵy bir joly - medıtsınalyq qyzmettiń baǵasyn kóterý. Al qyzmettiń qunyn kóterý úshin densaýlyq saqtaý salasyna bólinetin qarjynyń kólemin ulǵaıtý qajet. Bıýdjet tarapynan ondaı aqshanyń bolmaıtynyn eskerse, mindetti áleýmettik medıtsınalyq saqtandyrý qorynyń qarjysyna ol maqsatty oryndaýǵa ábden bolady.
Aıta keteıik, aldaǵy ýaqytta jedel medıtsınalyq járdem qyzmeti ózgertý aıasynda emxanalarda isteıtin keıbir dárigerlerdiń jalaqysyn kóterý josparlanyp otyr .