Dárigerlerdiń kásibı jaýapkershiligin qamsyzdandyrý modeli jyl sońyna deıin aıqyndalady
ASTANA. 12 qyrkúıek. QazAqparat - Dárigerlerdiń kásibı jaýapkershiligin mindetti túrde qamsyzdandyrý modeli jyl sońyna deıin aıqyndalady. Bul týraly búgin QR Prezıdenti janyndaǵy Adam quqyqtary jónindegi komıssııanyń otyrysynda QR Densaýlyq saqtaý mınıstri Salıdat Qaıyrbekova málim etti.
Mınıstr óz sózinde QR Prezıdenti Nursultan Nazarbaev «Qazaqstannyń áleýmettik jańǵyrtylýy: Jalpyǵa Ortaq Eńbek Qoǵamyna qaraı 20 qadam» atty baǵdarlamasynda eger medıtsına qyzmetkeri tarapynan salaqtyqpen nemese júrdim-bardym qaraý bolmasa, azamattyń densaýlyǵyna nuqsan keltirgeni úshin dárigerlerdiń kásibı jaýapkershiligin mindetti túrde qamsyzdandyrýdy engizý jónindegi máseleni taldap-zertteýge tapsyrma bergendigin atap ótti. «Atalǵan baǵyt aıasynda bizderde jaljaldy ahýaldy sotqa jetkizbeı sheshý tetigin qoldaný arqyly medıtsına qyzmetkerleriniń jaýapkershiligin qamsyzdandyrý modeli aıqyndalatyn bolady. Sáıkes zań jobasy odan ári qarap, talqylaý úshin mınıstrlik tarabynan engiziledi. Biz muny aǵymaǵy jyldyń sońyna deıin jasaýdy josparlap otyrmyz», - dedi S.Qaıyrbekova.
