Dárigerlerdi qoldaı otyryp, olardyń qyzmetine rýhanı kómek berýge shaqyramyn - Qasymhan Begman
TÚRKІSTAN. QazAqparat - Men barsha halyqty dárigerlerdi barynsha qoldap, qater ústinde jasap jatqan qyzmetterine rýhanı kómek berýge shaqyrar edim. Aqyn, Qazaqstannyń eńbek sińirgen qaıratkeri Qasymhan Begman koronovırýspen kúresip júrgen dárigerlerge qatysty osyndaı pikir bildirdi, dep habarlaıdv QazAqparat.
«Osyndaı qıyn-qystaý kezeńde janyn qaterge tigip, otandastarymyzdy aýrýdan aman alyp qalý jolynda talmaı, tynbaı qyzmet jasap jatqan dárigerlerdiń eńbegi eren. Óz otbasy, ul-qyzdaryn Allaǵa amanattap, adam janyna arasha bolyp júrgen olardyń qazirgi eńbegi qandaı qurmetke bolsa da laıyq. Osyny eskerip, Prezıdentimiz mańyzdy sheshim qabyldady. Qyzmet etip jatqan ornynyń, jaǵdaıynyń qaýiptiligine qaraı jalaqysyna ústemaqy taǵaıyndady. Aqsha - adam janyna arashashy bola almaıdy. Degenmen, bul sheshim medıtsına mamandaryn sapaly jumysqa yntalandyrýdyń tóte joly», - dedi Qasymhan Begman.
Onyń aıtýynsha, bul bastamany halyq jappaı qýattaǵan.
«Sebebi, dál qazirgi kezeńde Alladan keıingi senerimiz de, súıenerimiz de sol aq halattylar. Aýrýǵa dýshar bolǵan otandastarymyzdyń aldy aıyǵyp, óz úılerine oralýy – halyqtyń dárigerler qaýymyna degen senimin eseleı túskendeı.
Men barsha halyqty dárigerlerdi barynsha qoldap, jaǵymsyz pikir, jónsiz qyljaqpen jandaryn aýyrtpaı, qater ústinde jasap jatqan qyzmetterine rýhanı kómek berýge shaqyrar edim», - dedi ol.
Eske sala ketsek, Memleket basshysy Qasym-Jomart Toqaev koronavırýspen kúresip jatqan medıtsına qyzmetkerlerine kómek kórsetý týraly tapsyrma bergen edi. Osyǵan oraı Úkimet basshysy Asqar Mamın memlekettik komıssııanyń otyrysyn ótkizip, onda arnaıy sheshim qabyldady. Atalǵan sheshimge sáıkes medıtsına qyzmetkerleri jumysynyń qaýiptiligine qaraı 3-topqa bóline otyryp, olardyń jalaqysyna ústemeaqy qosylady.
