Dárigerlerden esep berýdi talap etýge tyıym salýdy usynamyn – Baǵdat Mýsın
«Osy aptada elordadaǵy birneshe medınıtsalyq mekemege arnaıy bardym, sebebi qazirgi ýaqytta biz medıtsına salasyn tsıfrlandyrý boıynsha mindetterdi iske asyrýdy basty nazarǵa qoıyp otyrmyz.
Aýrýhanalardaǵy medıtsınalyq aqparattyq júıeler dárigerlerge naýqastyń densaýlyǵyndaǵy negizgi kinárattarǵa ýaqytyly nazar aýdarýǵa, qıyn jaǵdaılarda naýqas úshin qajetti kómek kórsetýge baǵyttalýy tıis. Búginde dárigerlerdiń jumysyn jeńildetetin birqatar júıeler bar. Máselen, jedel járdem men aýrýhanalar arasyndaǵy ıntegratsııalyq júıe arqyly aýrýhananyń qabyldaý bólimi jedel járdem arqyly kele jatqan naýqastar týraly aqparatty kóredi. Al Qazaqstan Respýblıkasy Densaýlyq saqtaý mınıstrligi 2021 jyly tıimsiz 5 aqparattyq bazany qysqartty, al bizdiń mınıstrlik júrgizgen taldaýdan keıin bıyl taǵy da tıimdiligin kórsetpegen 5 derekqordy joıý mindetin qoıdym»,-deıdi mınıstr.
Nur-Sultan qalasynyń №3 kópbeıindi qalalyq aýrýhanasy men №9 emhanasyna barǵanymda dárigerler jumystaryna tejeý bolyp otyrǵan máseleler týraly aıtty. Mysaly, dáriger árbir patsıent úshin 13 mınýt ýaqytyn kompıýterge telmirip, tıisti júıe arqyly anyqtama toltyrýmen ótkizedi. Anyqtamanyń ishinde kóp ýaqyt alatyn túsiniksiz formalar bar, máselen, patsıentiń jasy, salmaǵy, naýqastyń syrqatynyń tarıhy jáne t.b. Osynyń bárin jeke-jeke toltyrý kerek. Medıtsına qyzmetkerleri sonymen qatar qaǵazbastylyqqa qatysty (esepter usyný) kóptegen problemalaryn kóterdi.
Búgingi tańda negizgi medıtsınalyq aqparattyq júıelerden basqa dárigerler jumys isteýge májbúr 10 aqparattyq baza bar. Bunyń árqaısysy ýaqytty alady. Ýaqytty kompıýterge emes, patsıentti qabyldaýǵa jumsaý kerek. Bir derekti birneshe júıege qaıtalap ornalastyrýdy boldyrmaý úshin tıisti aqparattyq derekqorlardy ońtaılandyrý týraly sheshim qabyldadyq.
Aqparattyq júıelerdi ázirleýshilerdiń aldyna naqty mindetter qoıdym. Sapaly júıeniń negizgi kórsetkishi bolýy úshin aqparattyq júıelerge derekterdi engizýge jumsalatyn ýaqyt qysqartylýy tıis. Biz 3 negizgi júıeden - sozylmaly búırek jetkiliksizdiginiń, dıabetpen aýyratyndardyń jáne júkti áıelderdiń tirkeliminen bas tartýdy josparlap otyrmyz. Bul júıeler tek esep berý úshin jasalǵan, osyǵan baılanysty dárigerler áli kúnge deıin keıbir málimetterdi atalǵan derekqorlarǵa engizýge májbúr.
«Sonymen qatar, el deńgeıinde dárigerlerden esep berýdi talap etýge TYIYM salýdy usynamyn. Júıeler bar, tıisti derekqorlar bar, tekserýshi organdar kerek bolǵan jaǵdaıda ózderine qajetti málimetterdi sol jerden ala alady. Biz qoljetimdilikti qamtamasyz etýge daıynbyz.
Biz eseptilikten arylyp, birinshi kezekte halyqqa barynsha baǵdarlaný kerekpiz. Aldaǵy ýaqytta densaýlyq saqtaý salasyndaǵy tsıfrlandyrý jumystaryna barynsha baqylaý júrgizý úshin óńirlerdegi medıtsınalyq mekemelerge arnaıy barýdy josparlap otyrmyn!»,-dedi Baǵdat Mýsın.