Dárigerler jýrnalısterdi qoǵamda úreı týdyratyn aqparattardan aýlaq bolýǵa shaqyrdy
ASTANA. QazAqparat - Elordalyq JITS Ortalyǵynyń dárigerleri jýrnalısterdi qoǵamda úreı týdyratyn taqyryptar men aqparattardan aýlaq bolýǵa shaqyrdy. Bul týraly Ortalyqtyń baspasóz qyzmetinen habarlady.
QR Prezıdenti N.Nazarbaevtyń 2016 jylǵy 15 qańtardaǵy Jarlyǵymen densaýlyq saqtaý salasyn damytýdyń 2016-2019 jyldarǵa arnalǵan «Densaýlyq» memlekettik baǵdarlamasy bekitildi. Qazirgi ýaqytta elimizdiń densaýlyq saqtaý salasy osy baǵdarlama aıasynda jumys atqarýda. Baǵdarlama tarmaqtarynyń biri - AITV/JITS máselelerin turǵyndarǵa shynaıy ári túsinikti jetkizý maqsatynda buqaralyq aqparat quraldary ókilderiniń bilimin arttyrý. Osyǵan oraı, Astana qalalyq JITS-qa qarsy kúres ortalyǵy jergilikti BAQ ókilderimen arnaıy semınar ótkizdi. Shara Astana qalasy ákimdiginiń qoldaýymen uıymdastyryldy.
Ortalyqtyń bas dárigeri Sábıt Ábdiraıymov atap ótkendeı, AITV ınfektsııasyn aýyzdyqtaýda BAQ-tyń yqpaly men atqarar róli orasan. «Ár túrli áleýmettik zertteýler osy taqyryptardaǵy aqparattardyń 90 paıyzyn halyq buqaralyq aqparat quraldarynan alatynyn kórsetip otyr. Sol sebepti sizder AITV-nyń aldyn alý maqsatynda júrgizilip jatqan is-sharalardy árqashan shynaıy ári naqty jetkizedi degen oıdamyn», - dedi ol.
AITV máselesine keńinen toqtalǵan bas dáriger orynbasarynyń mindetin atqarýshy Іnjý Aımaǵanbetova bolsa, tilshilerdi qoǵamda úreı týdyratyn, halyqty shoshytatyn aqparattardan aýlaq bolyp, kerisinshe odan saqtaný joldaryn kóbirek nasıhattaýǵa shaqyrdy.
Aıta ketý kerek, osy ýaqytqa deıin Astana qalasynda AITV-ny juqtyrýdyń 1108 oqıǵasy anyqtaldy. Infektsııaǵa shaldyǵý faktileri burynǵydaı áleýmettik jaǵdaıy tómen toptar arasynda ǵana emes, orta býyn jáne aýqatty azamattar arasynan tirkelý ústinde. Juqpanyń jynystyq jolmen taralýy artýda. Naýqastardyń 80 paıyzy - 20 men 39 jas arasyndaǵy jastar.
Semınarǵa qatysqan jýrnalıster indetten saqtaný joldaryn ásirese jastar arasynda keńinen nasıhattaý maqsatynda óz usynystaryn bildirip, oı-pikirlerimen bólisti. Sondaı-aq, BAQ ókilderi 2017 jylǵy EKSPO kórmesine keletin sheteldik qonaqtarmen jumys jóninde tushymdy jaýaptar aldy.
Sábıt Əbdraıymov búginge deıin Ortalyq jumysyna aqparattyq qoldaý kórsetip kelgen tilshilerge alǵys bildirip, aldaǵy ýaqyta da tyǵyz baılanysta bolýǵa shaqyrdy.
