Dárigerler júregi keýdesiniń syrtynda ornalasqan sábıdi aman alyp qaldy
ASTANA. QazAqparat - Brıtandyq dárigerler júrek bulshyqeti keýde qýysynyń syrtynda ornalasyp týǵan sábıdiń ómirin qutqaryp qaldy. Bul týraly Telegraph jazady.
Dárigerler Naomı Fındleı men Dın Ýılkınske bolashaq sábıleriniń sırek dertke shaldyqqandyǵy týraly júktiliktiń toǵyzynshy aptasynda eskertken. Medıtsına tilinde bul ektopııa júrekti syrqat dep atalady. Bul dertke shaldyqqandardyń ómir súrýge múmkindigi óte tómen.
Alaıda, aǵylshyn otbasy táýekelge bel býyp, sábıge ómir syılady.
22 qarasha kúni týǵan sábıge birden úsh operatsııa jasalǵan. Oǵan shamamen 50 jýyq dáriger qatysty. Hırýrgtar jasandy keýde qýysyn jasap, oǵan sábıdiń júregin salǵan. Nátıjesinde ol osyndaı sırek kezdesetin syrqattan aman qalǵan Ulybrıtanııadaǵy alǵashqy sábı bolyp otyr.
«Qyzym ómirge kelgen kezde biz durys sheshim qabyldaǵanymyzdy sezindik. Jaǵdaıdyń ońaı bolmaıtynyn bildik, daıyn boldyq. Alaıda bilikti mamandar qoldan kelgenniń bárin jasady», - deıdi sábıdiń ákesi Ýılkıns.
