Dárigerler jeńildigi bar dáriler retseptin toqsanyna bir ret jazyp beredi

ASTANA. QazAqparat - Dárigerler jeńildigi bar dáriler retseptin sozylmaly aýrýlary bar dıspanserlik esepte turatyn naýqastar úshin toqsanyna bir ret jazyp beredi. Bul týraly QR Densaýlyq saqtaý jáne áleýmettik damý mınıstrliginiń 2015 jyldyń qorytyndysy boıynsha jáne 2016 jylǵy alda turǵan mindetter týraly keńeıtilgen alqa otyrysynda mınıstrlik basshysy Tamara Dúısenova málimdedi.

Mınıstr Qazaqstan Respýblıkasynyń Densaýlyq saqtaý salasyn damytýdyń 2016-2019 jyldarǵa arnalǵan «Densaýlyq» memlekettik baǵdarlamasyn júzege asyrý sharalarynyń aıasynda dıspanserlik esepte turǵan aýrýlarǵa jeńildigi bar dárilik zattardy berý protsedýralaryn ońaılandyrý qarastyrylatynyn habarlady.

Osy maqsatta dári alý retseptiniń syzbasyn ózgertý usynylady. Dárigerler jeńildigi bar dáriler retseptin sozylmaly aýrýlary bar dıspanserlik esepte turatyn patsıentter úshin toqsanyna bir ret, qymbat dáriler alatyn aýyr túrdegi syrqattanǵandar úshin aı saıyn jazyp beretin bolady. Dárihanalar patsıentterge berilgen retseptter negizinde sáıkes dárilik zattardy berip, olardyń esebin júrgizedi. Jeńildigi bar dárilerdi berý protsedýralarynyń barlyǵy avtomattandyrylady dep josparlanýda.

«Qazirgi tańda Qazaqstanda 2 mln-nan astam jeńildigi bar dári alýshy patsıentter bar. Olar aı saıyn retsept alý úshin alǵashqy medıtsınalyq-sanıtarııalyq kómek uıymdaryna (MSAK) barady. Bul shara MSAK uıymdaryndaǵy kezekti edáýir tómendetedi, medqyzmetkerler júktemesin azaıtyp, qaǵazdaǵy qujat aınalymyn qysqartady», - dedi Tamara Dúısenova.