Dárigerler Jambyldaǵy atystan zardap shekkender týraly aıtty
TARAZ. QazAqparat - Jambyl oblysynyń Qarakemer aýylynda bir adam ólip, segizi jaralanǵan atys boıynsha tergeý jumystary júrip jatyr, dep habarlaıdy «QazAqparat» HAA tilshisi.
Eske sala ketsek, 6 qarasha kúni Jambyl oblysynda Asa aýylynan Qumtıynǵa bara jatqan avtomobıldiń ishinde eki jolaýshy kerisip qalady. Munyń arty top bolyp atysýǵa ákep soqtyrady. Keýde tusyna oq tıgen 30 jastaǵy Qarakemer aýylynyń turǵyny qaza tabady. Túrli dárejedegi tán jaraqatymen segiz adam aýrýhanaǵa túsedi .
Jambyl oblystyq densaýlyq saqtaý basqarmasynyń baspasóz qyzmetiniń habarlaýynsha, 6 qarashadan 7-sine qaraǵan túni 01:00-den erteńine 15:00-ge deıin Jambyl aýdandyq ortalyq aýrýhanaǵa segiz adam júgingen. «Olar Qumtıyn aýylynyń aýmaǵynda jaraqat alǵanyn aıtty. Altaýyna qabyldaý bóliminde em-dom jasalyp, al ekeýi hırýrgııalyq bólimge jatqyzyldy. Olardyń jaǵdaıy ortasha, ómirine qaýip tónip turǵan joq. Em qabyldap jatyr», - dedi baspasóz qyzmetindegiler.
Osy fakti Sotqa deıingi tergep-tekserýdiń biryńǵaı tizilimine (SDTBT) QR QK 99-baby («Adam óltirý»), 2-bóligimen tirkeldi.
