Dárigerler Jambylda túıneme juqtyrǵandardyń jaǵdaıyn aıtyp berdi
Jýyrda aqparat kózderinde óńir turǵyndarynyń «sibir jarasyn» juqtyrǵany týraly aqparat taraǵany belgili. Aýrýy anyqtalǵan naýqastardyń qazirgi densaýlyq jaǵdaıy týraly oblystyq shtab otyrysynda aıtyldy.
Jıynda oblystyq Taýarlar men kórsetiletin qyzmetterdiń sapasy men qaýipsizdigin baqylaý departamenti basshynyń orynbasary Ǵazız Nadýev túıneme dertine kúdikti dıagnozymen oblystyq juqpaly aýrýlar aýrýhanasyna jatqyzylǵan eki naýqastyń qazirgi jaı-kúıine toqtaldy.
«Bul 12 qyrkúıekte bolǵan jaıt. Emdeý mekemesine túıneme indetine kúdikti dıagnozymen eki azamattyń jatqyzylǵany týraly telefon arqyly aqparat túse sala, shuǵyl habarlama berý syzbasyna saı barlyq quzyrly mekemelerge habar berdik. Osyǵan oraı tıisti sala mamandary birlese otyryp, indettiń oshaǵy men aýmaǵyn anyqtaý maqsatynda epıdemıologııalyq-epızootııalyq zertteý júrgizdi. Olardyń Jambyl aýdany Aısha bıbi aýylynyń 1995 jáne 1975 jyly týǵan azamattary ekeni anyqtaldy. Olar 1-2 qyrkúıek kúni Jýaly aýdanynda veterınarlyq dárigerdiń ruqsatyn almaı, indet juqtyrǵan maldardy soıǵan. Al olar bir sharýa qojalyǵyna tıesili eken. Osy qosymsha zerdeleý jumystarynyń arqasynda atalǵan qojalyqtyń malshysy – Jýaly aýdany, Yntymaq aýylynyń turǵyndary 1971 jylǵy azamat pen onyń 1983 jylǵy áıelinen de túıneme indetiniń belgileri anyqtalyp, shuǵyl oblystyq juqpaly aýrýlar aýrýhanasyna jatqyzyldy. Búginde naýqastardyń jaǵdaılary turaqty qanaǵattanarlyq, emderin jalǵastyrýda», – dedi ol.
Jıynda belgili bolǵandaı, tekserý kezinde naýqastarmen qarym-qatynasta bolǵan 44 adam anyqtalypty. Olardyń 11-i – Jýaly, 10-y – Jambyl aýdandarynyń azamattary bolsa, 23-i Taraz qalasynan. Qazir olardyń bári medıtsınalyq baqylaýǵa alynǵan.
Arnaıy mamandar aýrý mal qamalǵan qora, jaıylymnan jedel 160 synama alyp, tekserý júrgizgen. Onyń 5-eýi oń nátıje bergen. Aýrý oshaǵy anyqtalǵan jerde kameralyq jáne qorytyndy dezınfektsııalyq jumystary tolyǵymen júrgizildi. Sonymen qatar 20 tamyzdan 11 qyrkúıek aralyǵynda jeke sharýashylyqqa tıesili 23 aýrý iri qara soıylǵany belgili bolyp otyr. Búginde olardyń etteri qaıda ótkizilgenin quzyrly mekeme mamandary anyqtap jatyr.
Aıta keterligi jergilikti laboratorııa synamadan indettiń bar ekenin anyqtaǵan bolsa, mınıstrlikke qarasty zerthana eshqandaı aýrý belgisin taba almaǵan. Alynǵan synamanyń eki túrli nátıjesi kúdik týǵyzady. Osyǵan qatysty shtab tóraǵasy, oblys ákiminiń orynbasary Erkebulan Daýylbaev tıisti sala mamandaryna naqty tapsyrma berdi.
«Mınıstrliktiń laboratorııasy ony anyqtaı almaǵan bolsa, ony habarlaý kerek. Eger ol mekemeniń qural-jabdyqtary jańartýdy qajet etse, oǵan qarajat bólý jaǵyn qarastyrýǵa tıispiz. Al eger mamandar biliktilik talaptaryna saı kelmese, olardyń jaýapkershiligin qaraý kerek. Zerdeleý jumystarynyń qorytyndysyn kútip, osy boıynsha jumys isteýge tıispiz»,– dedi Erkebulan Daýylbaev.
Jıynda osy salada atqarylyp jatqan jumystarǵa toqtalǵan oblystyq veterınarııa basqarmasynyń basshysy Ospan Berdııarov atalmysh indet tirkelgennen keıin zerdeleý jumystary bastalyp ketkenin jetkizdi.
Mamyr-maýsym aılarynda sibir jarasynyń oshaqtarynan synamalar alynǵan eken. Biraq eshqandaı indet anyqtalmaǵan. Basqarma basshysynyń aıtýynsha, mal eti arqyly dert taratýy múmkin ári eń qaýipti sanalatyn oryn – shujyq shyǵaratyn tsehtary.
«Biz júıeli jumys júrgizý úshin, veterınarııa salasy boıynsha tıisti sala mamandaryn tarta otyryp, naqty ereje bekitýge tıispiz. Bul nátıjeli jumys júrgizýdiń kepili bolmaq. Sonymen qatar qala men aýdan boıynsha maldardyń ekpemen qamtylýyna, eld mekenderdegi sharýashylyq qojalyqtaryna jáne olardyń mal sanyna zerdeleý jumysyn júrgizý kerek», – degen Erkebulan Daýylbaev erejeniń jobasyn daıyndaýdy tapsyrdy.
