Dárigerler J.Dosqalıevtiń ótinishi boıynsha jalǵan dıagnoz qoıǵandyqtaryn moıyndady - Qarjy polıtsııasy
ASTANA. Qazannyń 4-i. QazAqparat /Marlan Jıembaı/ - Búgin BAQ ókilderiniń basyn qosyp, baspasóz máslıhatyn ótkizgen QR Ekonomıkalyq jáne sybaılas jemqorlyqqa qarsy kúres agenttiginiń resmı ókili Murat Jumanbaı Ulttyq ǵylymı medıtsınalyq ortalyqtyń dárigerleri Densaýlyq saqtaý mınıstri Jaqsylyq Dosqalıevtyń ótinishi boıynsha jalǵan dıagnoz qoıǵandyqtaryn moıyndaǵandaryn málim etti.
Qyrkúıektiń 30-ynda qyzmettik ókilettigin asyra paıdalandy degen aıyppen qylmystyq is qozǵalǵan Densaýlyq saqtaý mınıstri J.Dosqalıevtiń aýrýdy syltaýratyp otyrǵandyǵyn aıǵaqtaıtyn beınejazbany kórsetkendikterin atap ótken ol: «Alaıda qazannyń 1-inde Ulttyq ǵylymı medıtsınalyq ortalyqtyń dárigerleri jalǵan aýyr naýqas J.Dosqalıevtiń jýrnalıstermen foto jáne beıne túsirilimin uıymdastyryp, jurtshylyqty aldaýdy jalǵastyrdy», dedi.
Resım ókildiń aıtýyna qaraǵanda, tergeý barysynda kúdiktini qaraǵan ári oǵan komalyq jaǵdaıda dep dıagnoz qoıǵan dárigerlerden kýáger retinde jaýap alynǵan. «Konsılıýmnyń tóraǵasy, bas dárigerdiń orynbasary Álibek Mustafın óz jaýabynda Dosqalıevtiń klınıkaǵa kelip túsken ýaqyttan bastap, búgingi kúnge deıin adekvatty jáne esinde ekendigin moıyndady», dep atap ótken M.Jumanbaı, sóziniń dáleldi bolýy úshin atalǵan dárigerden suraq-jaýap alynǵan beıne materıaldy BAQ ókilderiniń nazaryna usyndy.
Onda tergeýshiniń saýaldaryna jaýap bergen Á.Mustafın qoıylǵan jalǵan dıagnozdy jáne tergeý organdary men BAQ-qa usynylǵan jalǵan aqparatty Dosqalıevtiń ótinishi boıynsha bergendikterin aıtyp otyr.
«Osyndaı jaýapty basqa da dárigerler berdi. Olar ózderiniń alǵashqy jaýaptarynyń jalǵandyǵyn moıyndady», dep qorytty sózin resmı ókil.
