Dárigerler vırýsty patsıentterden juqtyrýy múmkin - Almaty
ALMATY. QazAqparat – Almatyda dárigerler koronavırýsty patsıentterden juqtyrýy múmkin. Bul týraly qalalyq qoǵamdyq densaýlyq saqtaý basqarmasynyń basshysy Tileýhan Ábildaev onlaın brıfıng barysynda aıtty, dep habarlaıdy QazAqparat tilshisi.
«Barlyq baılanysta bolǵan adamdarǵa dıagnozdaryn anyqtaý boıynsha jumystar júrgizilýde. Vırýsty olar patsıentterden de juqtyrýy múmkin, óıtkeni olar shuǵyl medıtsınalyq kómek kórsetýdi jalǵastyryp otyrdy. Olardyń ishinde aýrý belgileri bilinbeıtin patsıentter de bolýy múmkin», - dedi Tileýhan Ábildaev.
Onyń aıtýynsha, qazirgi ýaqytta atalǵan fakti boıynsha epıdemıologııalyq tekserý júrgizilip jatyr.
Sonymen qatar, medıtsına qyzmetkerlerin tekserip-qaraý boıynsha barlyq sharalar qoldanylyp jatyr.
Barlyq qalalyq klınıkalardyń ishinde qyzmetkerlerdi koronavırýsqa mindetti túrde tekserip-qaraýmen epıdemııaǵa qarsy is-sharalar kúsheıtildi.
Aıta ketý kerek, Almatyda 116 dáriger koronavırýs juqtyrǵanyn munyń aldynda jazǵan bolatynbyz.
