Dárigerler: Túnde tamaq jeý este saqtaý qabiletin tómendetedi
ASTANA. QazAqparat - Buǵan deıin talaı zertteýler júrgizilip, túngi ýaqytta tamaq jeý adamǵa artyq salmaq qosatyny jáne sýsaq (dıabet) dertine soqtyrýy yqtımal ekendigi aıtylyp kelgen. Bul joly AQSh-tyń Kalıfornııa ýnıversıtetiniń ǵalymdary bul ádettiń múlde basqa biz bilmeı kelgen taǵy bir zııany bar ekenin anyqtady, dep jazady sheteldik BAQ.
Belgili bolǵandaı, mezgilsiz ýaqytta jáne tym kesh tamaq jeý adamnyń este saqtaý qabiletine keri áserin tıgizedi eken.
Ony ǵalymdar bylaı túsindiredi: adamnyń 24 saǵatqa beıimdelgen bıorıtmi bar. Sondyqtan túngi ýaqytta adam aǵzasy tynyǵýǵa, demalýǵa ózin beıimdep turatyn kórinedi. Osy kezde asqazanǵa as tússe, ol sony qorytý úshin óz bıorıtminen ózgertedi. Sonyń kesirinen uıqy ýaqyty keıinirek shegeriledi. Bul óz kezeginde adamnyń burynǵy ótken ýaqyttarda bolǵan dúnıelerdi este saqtaýǵa jaýap beretin mı bóligine kúsh túsirip, ol óz qyzmetin jóndi atqara almaıdy. Mine, osylaısha adam kóp ýaqyt buryn, keıde jýyq arada bolǵan keı jaıttardy esine túsire almaı qınalatyn kórinedi.
Ǵalymdar osy ǵylymı jańalyq uıqysyzdyq dertine shaldyqqan adamdarǵa paıdaly bolýy múmkin dep otyr. Olar osy dertten zııan shegip júrgen jandardyń tamaq ishý ýaqytyn retteý arqyly olardy uıqysyzdyqtan emdep kórmek.
