Dárigerler: Temeki shegý soqyr qylady
ASTANA: QazAqparat - Makýlıarlyq degeneratsııa - adamdy janarynan aıyratyn eń qaýipti syrqattardyń biri. Onyń sońy atrofııaǵa ulasyp, kózdiń kórýin júzege asyratyn qabattardyń qyzmeti tómendeıdi, dep jazady Rosbalt.
Dál osyndaı dertke shaldyǵý qaýpi temeki shegetin adamdarda joǵaryraq bolyp shyqty, dep jazady Meddaily.
Bul jaıly Vıskonsın ýnıversıtetiniń ǵalymdary uzaq ýaqytqa sozylǵan (1988 jyldan beri) jan-jaqty zertteý júrgizgen. Oǵan 5 myńǵa jýyq temeki shegetin adam qatysqan. Áý basta olardyń janarlary sýretke túsirilip alynǵan, sodan keıin ár 5 jyl saıyn sýretti jańalap otyrǵan.
Zertteýdiń sońyna deıin 4439 adam jetken. Nátıjesinde makýlıarlyq degeneratsııa qatysýshylardyń 24%-ynda paıda bolǵan. Al, 4,5%-y bul derttiń asqynǵan túrine shaldyqqan.
