Dárigerler SQO-da koronavırýs juqtyrǵandar týraly aıtty
PETROPAVL. QazAqparat – Soltústik Qazaqstan oblysynda koronavırýs juqtyrǵan eki adam buǵan deıin anyqtalǵan áıelmen qarym-qatynasta bolǵan, dep habarlaıdy QazAqparat tilshisi.
SQO Densaýlyq saqtaý basqarmasynyń málimetinshe, juqpaly indetti juqtyrǵandar Petropavl qalasynyń 1971 jáne 1975 jylǵy turǵyndary. Eki áıel de úı karantıninde bolǵan. Saraptama alynyp, ınfektsııany juqtyrǵandary rastalǵannan keıin naýqastar algorıtmge sáıkes juqpaly aýrýlar aýrýhanasyna jetkizildi.
Mamandardyń aıtýynsha, olardyń jaǵdaılary birqalypty. Úılerinde dezınfektsııalyq jumystar júrgizilip jatyr. Sondaı-aq qarym-qatynasta bolǵan aınalasy anyqtalý ústinde.
Bul – SQO-da búgindikke anyqtalǵan osymen úshinshi jaǵdaı. Buǵan deıin Petropavl qalasynyń 1954 jyly týǵan turǵynynan da qaýipti indet tabylǵan bolatyn. SQO Densaýlyq saqtaý basqarmasy jetekshisiniń orynbasary Nurlan Aımanovtyń aıtýynsha, koronavırýs ınfektsııasy tabylǵan áıelde pnevmonııa aýrýynyń belgileri bolǵan. Qan taldaýy onyń aýrýdy juqtyrǵanyn kórsetken. Onymen jaqyn qarym-qatynasta bolǵan 73 adam jáne aýrý oshaǵy tabylǵan úıdiń podezi karantınge alyndy. ⠀
