Dárigerler sımptomy joq KVI juqtyrǵandar nege úıde emdeletinin túsindirdi
ALMATY. QazAqparat – Almatyda ótken onlaın brıfıng barysynda dárigerler KVI juqtyrǵan naýqastardyń keıbiri nege úıde emdelýi tıis ekendigin túsindirdi, dep habarlaıdy QazAqparat tilshisi.
Dáriger ınfektsıonıst Tamara Utaǵanovanyń aıtýynsha, álemde KVI emdeýdiń klınıkalyq dıagnostıkalyq hattamasynyń 9 redaktsııasy engizilgen.
«Halyqaralyq aýrýlar klassıfıkatsııasy boıynsha aýrýlardy qalaı tirkeýdi anyqtadyq. Qarqyndy terapııa jáne reanımatsııalyq bólimshelerge qaı naýqastardy jatqyzý kerek. Sımptomy joq naýqastar, jeńil naýqastardy emdeý, medıtsınalyq-sanıtarlyq kómek uıymdarynyń kómegi, baqylaýy, qalaı oqshaýlaný kerektigi týrasynda ózgerister engizildi», - dedi maman.
Qazir sonymen qatar naýqastardy emdeýge aldyńǵy hattamada joq dáriler engizilgen.
«Munyń aldynda barlyq naýqastar aýrýhanaǵa jatqyzylatyn edi, aýrýhanada baqylanatyn. Olardy sımptomdary bolsyn-bolmasyn dári-dármekpen emdeıtinbiz. Qazir eger esh belgileri joq bolsa, aýrý jeńil ótse, em-sharalaryn júrgizý qajettiligi joq. Eger naýqastyń boıynda qosalqy aýrýlar bolatyn bolsa, onda ol adam birinshi sanıtarlyq medıtsınalyq kómek uıymdarymen baqylanady. Baqylaý qashyqtan bolady, kúndelikti 2 ret qońyraý shalý nemese 3 kúnde bir ret vıdeoqońyraý shalý arqyly jasalady», - dedi Tamara Utaǵanova.
Sonymen qatar, dáriger úıinde sımptomsyz jatqan naýqastarǵa ne ishý kerektigin túsindirdi.
«Úıde jatqan sımptomy joq adamdar ne dári ishýi kerek? Arnaıy dári qabyldanbaıdy. Tek baqylaý júrgiziledi. Naýqastyń qyzýy kóterilgende - qyzýǵa qarsy, tamaǵy jybyrlasa - sımptomaktıkalyq em jasaý kerek», - dedi T. Utaǵanova.
Qalanyń bas sanıtarlyq dárigeri Jandarbek Bekshınniń aıtýynsha, qazir qalada sońǵy 10 kúnde aýrý kórsetkishi 5% bolyp tur.
Qala bıligi osy kórsetkishti 1%-ke deıin tómendetýdi maqsat tutyp otyr. Sonymen qatar, qaladaǵy tósek oryndardyń 95 paıyzy tolǵan.
