Dárigerler: shylym shegý koronavırýstan qorǵaıdy degen — mıf

ALMATY. QazAqparat – Temeki shegýshiler koronavırýs ınfektsııasyn juqtyrmaıdy degen mıfti Almatydaǵy kardıologııa jáne ishki aýrýlar ǴZI kúndizgi statsıonarynyń terapevti Gaýhar Qojakeeva joqqa shyǵardy, dep habarlaıdy QazAqparat.

DDSU málimetteri boıynsha, jer betindegi 7,5 mlrd halyqtyń shamamen 1 mlrd-y temeki shegedi. Jyl saıyn 5,7 mlrd temeki shegiledi, shamamen 1 mln. tonna temeki tuqyly tastalady, dep habarlaıdy The TobaccoAtlas amerıkalyq bastamashy top sarapshylary. Olar tek qorshaǵan ortaǵa ǵana emes, sonymen qatar adamdarǵa da zııan keltiretini týraly faktilerdi usyndy, sebebi ol tsellıýloza atsetatynan, tabıǵı jaǵdaılarda is júzinde ydyratylmaǵan ónimnen turady.

«Dúnıejúzilik ólim-jitimniń barlyq sebebiniń ishinde temekini tutynýdan bolatyn ólim ekinshi orynda. Sonymen qatar, temeki shegýdi búkil álemdegi adamdardyń óliminiń sebepshisi bolatyn faktorlardyń biri dep sanaýǵa bolady. Zııandy ádet adamnyń ómirin 10-14 jylǵa qysqartady.

Jalpy, temeki shegý adam aǵzasynyń barlyq organdary men júıelerine, atap aıtqanda júrek-tamyr, as qorytý, reprodýktıvti júıe, kórý músheleri, zár shyǵarý organdaryna teris áser etedi. Barlyq músheler men júıeniń zaqymdanýy ınsýlt, erinniń, tildiń, kómeıdiń, óńeshtiń, ókpeniń obyry, parodontıt, stomatıt, SOÓA, stenokardııa, qolqa anevrızmasy, shashyrańqy skleroz, mıokard ınfarktisi, gıpertonııalyq aýrý, ateroskleroz, asqazan men ultabardyń oıyq jarasy, gastroezofagealdyq reflıýks, osteoporoz, bedeýlik, ımpotentsııa sekildi sozylmaly aýrýlarǵa ákeledi», - dedi G.Qojakeeva.

Dárigerdiń aıtýynsha, temeki shegýshilerde ımmýnıtettiń tómendeýi jáne ókpe tininiń zaqymdanýy aıasynda aýrý kóbinese pnevmonııanyń damýymen aýyr formalarǵa aýysatyny dáleldendi. Sondyqtan temeki shegý adamdy koronovırýs juqtyrýdan qorǵaıdy dep aıtý durys emes. Kerisinshe, temeki shegý aýyr aýrýlar men ólimge ákeletin qosymsha qaýip týdyrady.