Dárigerler Shortandydaǵy jarylystan zardap shekkenderdiń jaǵdaıy týraly aıtty
KÓKShETAÝ. QazAqparat – Aqmola oblysynyń densaýlyq saqtaý basqarmasynyń basshysy Narıman Syzdyqov Shortandy kentinde gaz ballony jarylýynyń saldarynan zardap shekkenderdiń jaǵaıy týraly aıtty, dep habarlaıdy QazAqparat tilshisi.
Basqarma basshysynyń aıtýynsha, zardap shekken eki balanyń jaǵdaıy óte aýyr, deneleriniń 90 paıyzyn kúıik shalǵan.
«Bizdegi málimet boıynsha úsh adam kóz jumyp, on adam zardap shekti. Jalpy, aýrýhanaǵa 11 adam jetkizildi, onyń ishinde bir qyz bala dárigerler kórgen soń týystarynyń úıine ambýlatorııada em qabyldaýǵa jiberildi. Tórt bala shuǵyl Nur-Sultan qalasyndaǵy №2 balalar aýrýhanasynyń anestızııa jáne jansaqtaý bólimshesine jatqyzyldy. Eki eresek adam Nur-Sultandaǵy №1 qalalyq aýrýhananyń kúıik bólimshesine ornalastyryldy. Sonymen birge, Shortandy aýdandyq aýrýhanasynda bir bala men bir áıel stantsıonarlyq em qabyldaýda. Qalǵan zardap shekkender ambýlatorııaly em qabyldaýda. Jansaqtaý bóliminde jatqandardyń jaǵdaıy óte aýyr. Onda jatqan eki balanyń biri, 2009 jylǵy ul men 2012 jylǵy qyzdyń deneleriniń 90 paıyzyn kúıik shalǵan. Olar ókpeni jeldetý apparatyna qosylǵan. Kúıik bólimshesine túsken eki er adamdardyń jaǵdaıy da óte aýyr. Olardyń denesiniń 70 jáne 40 paıyzyn kúıik shalǵan», - dedi jýrnalıstermen ótken brıfıngide Aqmola oblysynyń densaýlyq saqtaý basqarmasynyń basshysy Narıman Syzdyqov.
Basqarma basshysy atap ótkendeı, jarylystan zardap shekkenderge medıtsınalyq kómek kórsetý úshin sol kúni Shortandy aýdandyq aýrýhanasyna Nur-Sultan qalasyndaǵy kópbeıindi oblystyq aýrýhanadan reanematolgtar men hırýrgtar kelgen. Sondaı-aq, Kókshetaý qalasynan sanavıatsııamen quramynda balalar reanımatologtary men hırýrgtar top kelip jetken.
Eske sala ketsek, keshe Shortandy kentinde barak tıpti úsh páterli úıde gaz ballony jaryldy. Oqys oqıǵa týraly habarlama órt sóndirý bólimine saǵat 21:38-de kelip túsken. Órtti sóndirýge TJD-nyń 35 qyzmetkeri men 7 tehnıkasy, «Jer Ana» JShS MEÓQQ-nyń 4 qyzmetkeri men 1 tehnıkasy jumyldyrylǵan.
Qazirgi málimet boıynsha, úıindiniń astynan úsh adamnyń denesi tabyldy, onyń bireýi kámelettik jasqa tolmaǵan bala. Sonymen birge, túrli deńgeıdegi dene kúıigimen 10 adam aýrýhanaǵa jatqyzyldy, onyń ishinde balalar bar. Keıbir zardap shekkenderdiń jaǵdaıy aýyr.
