Dárigerler shetelge shyqqanda qandaı ekpe alý kerektigin aıtty
ALMATY. QazAqparat - Almatyda qalalyq Densaýlyq saqtaý basqarmasy shetelden juqpa juqtyryp keletin týrısterdi baqylaıtyn shtab qurdy, dep habarlaıdy QazAqparat tilshisi.
Shtabtyń búgingi otyrysynda týrıster arasynda asa qaýipti juqpaly aýrýlardyń aldyn alý boıynsha vedomstvoaralyq jedel áreket etý boıynsha jospar quryldy. Jıynǵa qalalyq Qoǵam densaýlyǵyn qorǵaý departamentiniń, týrızm basqarmasynyń, Almaty áýejaıynyń medıtsınalyq qyzmet bóliminiń, týrıstik ortalyqtyń mamandary qatysty.
Basqarma basshysy Serikbol Mýsınov qaladaǵy epıdemıologııalyq ahýaldy qatań baqylaýǵa alý týraly tapsyrma berdi.
Sanıtarlyq qadaǵalaý bóliminiń mamandary shetelge shyǵatyn týrısterge aldyn ala ekpe salyp alýǵa keńes berdi.
«Shetelge shyǵatyn týrısterdiń medıtsınalyq saqtandyrý polısi bolýy tıis. Sonyń arqasynda týrıster óz densaýlyǵyna qatysty tótenshe oqıǵalardan saqtana alady. Qajetti dári-dármekti Qazaqstanda satyp alǵan abzal. Keıbir dáriler shetelde satylmaıdy. Klımaty ystyq elderge shyqpas buryn aldyn ala ekpe qabyldaýǵa keńes beremiz. Tropıkalyq elderge shyqpas buryn - kúl, sal, sirespe aýrýlaryna qarsy, Afrıka (Sahara shólinen ońtústikke), Latyn Amerıkasy eline shyǵatyn adamdar - sary bezgekke qarsy, Mekkege qajylyqqa attanatyndar - menıngokok juqpasyna qarsy, Ońtústik Shyǵys Azııa elderine baratyndar sary bezgek pen V gepatıtine qarsy ekpe alýy kerek», - dedi mamandar.
Aıta ketý kerek, jyl basynan beri Úndistannan demalyp kelgen 5 adam tyrysqaq aýrýyn juqtyryp kelgenin habarlaǵan bolatynbyz. Olardyń barlyǵy jaǵajaıda sýǵa túsken, teńiz ónimderin shıki kúıinshe jegen.
