Dárigerler shekaradan ótýge qajetti anyqtamany qoldan jasaǵan – UQK

NUR-SULTAN. QazAqparat – Ulttyq qaýipsizdik komıteti karantın shekteýi kezindegi QR aýmaǵyna zańsyz kirý-shyǵý arnasyn toqtatqanyn málim etti, dep habarlaıdy QazAqparat komıtettiń saıtyna silteme jasap.

Komıtettiń ShQO-daǵy departamenti «J» jeke medıtsınalyq ortalyǵynyń Qazaqstan shekarasyn zańsyz ótýge qoldanylatyn jalǵan dárigerlik konsýltatsııalyq komıssııa (DKK) qorytyndysyn satýdy toqtatqan.

«18 qyrkúıekte jalǵan DKK qorytyndysyn satyp alý arqyly atalǵan medıtsınalyq ortalyq qyzmetkerleriniń zańsyz áreketi rastaldy. Búǵan deıin berilgen 200 jýyq DKK qorytyndysy, dárigerlerdiń qoly men tańbasy qoıylǵan toltyrylmaǵan blankiler, tańbalar jáne kompıýter tabylyp, tárkilendi. Kýágerlerden jaýap alý nátıjesinde DKK túpnusqalary alynyp, ekspertızaǵa joldandy», delingen habarlamada.

Medıtsınalyq ortalyq dırektorynyń orynbasary men bas dárigeri 5 myń teńgege jalǵan DKK qorytyndysyn satqan. Olar shetel medıtsınalyq mekemesinen shaqyrý qajet bolǵan jaǵdaıda, qyzmet baǵasyn 10 teńgege baǵalaǵan.

Atalǵan is boıynsha komıtettiń ShQO boıynsha departamenti Qylmystyq kodekstiń 385-baby 1-tarmaǵymen qylmystyq is qozǵady.

Tergeý sharalary jáne jınaqtalǵan dáleldeme nátıjesinde kúdiktiler óz kinásin tolyǵymen moıyndady. 19 qarashada sot kúdiktilerdi Qylmystyq kodekstiń 385-baby 2-tarmaǵy boıynsha kináli dep tanyp, árqaısysyna 1 000 AEK kóleminde aıyppul taǵaıyndady.

Taǵy aıta ketetin jaıt, sońǵy kezde Qazaqstan azamattary jáne sheteldikterdiń túrli zańsyz jolmen, jalǵan medıtsınalyq anyqtamamen QR-RF shekarasyn zańsyz ótý faktileri tirkelgen.

Qyrkúıek aıynan beri úsh ShQO turǵyny jalǵan medıtsınalyq anyqtamamen shekaradan zańsyz ótpek bolǵany anyqtaldy.