«Dárigerler senimine selkeý túskeni qalaı?»- respýblıkalyq basylymdarǵa sholý
***
Keshe Nazarbaev Ýnıversıtetinde Qazaqstan Respýblıkasynyń Prezıdenti Nursultan Nazarbaev «Qazaqstan bilim qoǵamy jolynda» atty dáris oqydy. Elbasynyń halyqaralyq ýnıversıtet qabyrǵasynda oqyǵan ınteraktıvti dárisi jalpy otandyq bilim berý salasynda turaqty dástúrge aınalyp kele jatqan ıgilikti úrdistiń biri deýge bolady. Elimizdegi bilim berý oshaqtarynyń zamanaýı aqparattyq tehnologııalarmen jabdyqtalýy nátıjesinde júzege asqan Elbasy oqýyn bul kúni respýblıkamyzdaǵy joǵary jáne orta bilim júıesindegi barsha shákirtter tyńdaýǵa múmkindik aldy. Osy jaıt arqaý bolǵan maqala «Egemen Qazaqstan» gazetiniń búgingi sanynda «Bilimdi jas - el erteńi» degen taqyryppen jarııalandy. Sondaı-aq basylymda Elbasynyń dárisi tolyq berilgen.
Elimizdiń quqyq qorǵaý júıesinde jappaı jańǵyrtý qolǵa alynyp jatyr. Oǵan qosa sybaılas jemqorlardy anyqtaý isi de jańasha pysyqtalýda. Ásirese, qolynan is kelmeıtin, ıaǵnı mindetine laıyqty emes qyzmetkerlerdi quqyq qorǵaý organdarynan alastatý barysy kópshilikti qýantýda. Mine, osy jáne ózge de máselelerge baılanysty «Egemen Qazaqstan» gazeti tilshisiniń saýalyna Іshki ister mınıstriniń orynbasary Amantaı Kúreńbekov jaýap qaıtarǵan. «Jalpy, aǵymdaǵy jyldyń 7 aıy ishinde polıtsııa qyzmetkerleri 115 sybaılas jemqorlyq quqyq buzýshylyǵyn jasaǵan. Іshki ister mınıstrligi eń iri quqyq qorǵaý vedomstvosy bolyp tabylady. Munda 70 myńnan astam qyzmetkerdiń bar ekenin eskersek, sybaılas jemqorlyq qylmystaryn qyzmetkerlerdiń jalpy sanyna shaqqanda, myń qyzmetkerge 2 sybaılas jemqorlyq keledi eken. Bul basqa memlekettik organdarmen salystyrǵanda anaǵurlym az», - dedi ol «Tazarý» degen taqyryppen berilgen suhbatynda.
***
«Jaýyrdy jaba toqyp, nesine kúlbilteleıik. Budan burynǵy bedelinde sharýamyz joq. Biraq búgingi dárigerlerdiń qadiri quldyrap barady. Bútindeı bir mamandyq ıelerine topyraq shashýdan aýlaqpyz. Qudaı saqtasyn. Alaıda kúndelikti ómirde kezdesetin dárigerlerge qatysty kereǵar jaǵdaılar janymyzǵa batqan soń bulaı demeske sharamyz qalmady», - dep jazady «Alash aınasy» gazeti. Basylymnyń atap ótýinshe, búginde medıtsına salasy ozyq tehnologııalarmen, úzdik, tańdaýly apparattarmen jabdyqtalýda. Al bilikti, bilimdi mamandar kemidi. Olar naýqasty júre qarap, júre qaraıdy. Maqala «Dárigerler senimine selkeý túskeni qalaı?» degen taqyryppen berilgen.
Osy basylymnyń turaqty «Dat!» aıdarynda Qazaqstan rentgenoradıologtary qaýymdastyǵynyń prezıdenti, medıtsına ǵylymynyń doktory Janǵalı Hamzabaevpen aradaǵy suhbat jarııalandy. Basylym tilshisiniń barlyq saýalyna tuşymdy jaýap bergen ol: «Árıne, dıagnoz qoıarda adamnyń rentgennen meılinshe az ótkeni jón. Biraq aýrý-syrqattyń naqty dıagnozy bárinen de qymbat qoı. Sondyqtan rentgenniń kómegimen qandaı da bir dertti qaraǵan kezde, biz radıatsııa mólsheriniń aýrýdan keletin qaýip-qaterdi tolyǵymen aqtaýy tıis ekendigin túsinýimiz qajet. Bir ret qara, on ret qara, biraq naqty dıagnoz qoı?», - deıdi.
***
«Memlekettik organdarǵa jarııalanatyn baıqaýǵa endi qoǵam ókilderi qatysa bastady», - dep jazady «Aıqyn» gazeti búgingi sanyndaǵy «Memlekettik laýazym: Úmitkerler jańa tásilmen iriktelýde» degen taqyryptaǵy maqalasynda. Basylymnyń jazýynsha, Memlekettik qyzmet isteri agenttigi bos laýazymdarǵa úmitkerlerdi jańa tásilmen irikteýge kirisken. Táýelsiz sarapshylar bul jemqorlyqty azaıtyp, memlekettik qyzmetke laıyqty azamattardyń kelýine septigin tıgizedi dep senedi. Oǵan qosa, olar bul tájirıbeni basqa memlekettik organdarǵa da engizý kerek dep esepteıdi.
***
«Kazahstanskaıa pravda» gazetiniń jazýynsha, keshe Memleket basshysy Nursultan Nazarbaev Qazaqstan Respýblıkasy Premer-Mınıstriniń birinshi orynbasary Serik Ahmetovti qabyldady. S.Ahmetov Qazaqstan Prezıdentine aǵymdaǵy áleýmettik-ekonomıkalyq kórsetkishter, Údemeli ındýstrııalyq-ınnovatsııalyq damý baǵdarlamasyn iske asyrý barysy jáne aldaǵy jylytý kezeńine daıyndyq jónindegi is-sharalar týraly baıandady. Nursultan Nazarbaev kezdesýdiń qorytyndysy boıynsha birqatar naqty tapsyrmalar berdi.
