Dárigerler revaktsınatsııanyń mańyzdylyǵy týraly aıtty

ALMATY. QazAqparat – Qalada COVID-19 ahýalynyń turaqtanǵanyna qaramastan, revaktsınalaný boıynsha aýqymdy naýqan bastalady. Almaty qalasy qoǵamdyq densaýlyq basqarmasy basshysynyń orynbasary Svetlana Sultanǵazıeva men Almaty qalasy sanıtarlyq-epıdemıologııalyq baqylaý departamenti basshysynyń orynbasary Ásel Qalyqova Óńirlik kommýnıkatsııalar qyzmetinde ótken baspasóz konferentsııasynda osy máseleni keńinen aıtyp berdi, dep habarlaıdy QazAqparat tilshisi.

Svetlana Sultanǵazıevanyń aıtýynsha, COVID-19 vaktsınalarynyń jańa shtammdarǵa qarsy qorǵanys áseri tómendeýi múmkin, sondyqtan revaktsınalaný usynylady.

«Revaktsınalaný protsedýrasynan alǵashqy vaktsınalanýdan keıin 6 nemese 9 aıdan keıin ótý kerek, bul koronavırýstyń jańa nusqalarynan durys qorǵanyý úshin qajet», - dedi dáriger.
Spıker Almatyda bar «Vero Cell», «Spýtnık V» jáne QazVac vaktsınalarynyń barlyǵy «delta» nusqasyna qarsy jaqsy qorǵanys jáne profılaktıkalyq qasıetterge ıe ekenin atap ótti.
Óz kezeginde, Almaty qalasy sanıtarlyq-epıdemıologııalyq baqylaý departamenti basshysynyń orynbasary Ásel Qalyqova revaktsınatsııa kezinde ujymdyq ımmýnıtet derbes qalyptaspaıtynyn tilge tıek etti.
«Mundaı vaktsınalaný aldyńǵy ekpeden soń nemese adam aýyrǵannan keıin paıda bolǵan aǵzanyń ımmýndyq reaktsııasyn qoldaýǵa jáne kúsheıtýge múmkindik beredi. Revaktsınalaný kezinde ujymdyq ımmýnıtet derbes qalyptaspaıdy. Aýrýdyń tómendeýi úshin vaktsınalaný jáne revaktsınalanýdan soń 75-80% aralyǵynda ujymdyq ımmýnıtet qajet», - dedi ol.
Epıdemıolog qazirgi ahýaldyń turaqtanýyna jáne derttiń ósý qarqynynyń tómendeýine qaramastan, ınfektsııanyń taralýyn azaıtý týraly áli erte ekenin atap ótti.
«Biz ekpe alyp, sodan soń revaktsınalansaq, onda ınfektsııany jeńýge bolady», - deıdi Ásel Qalyqova.