Dárigerler patsıentti qaraýdyń ornyna qaǵazbastylyqtan aryla almaı keledi - Q.Toqaev

ASTANA. QazAqparat - Dárigerler patsıentti qaraýdyń ornyna qaǵazbastylyqtan aryla almaı keledi. Búgin Parlament Senatynda ótip jatqan Densaýlyq saqtaý jáne áleýmettik damý mınıstrimen kezdesý barysynda sóz sóılegen palata spıkeri Qasym-Jomart Toqaev osylaı málim etti.

«Densaýlyq saqtaý salasyndaǵy qalyptasqan ahýalǵa basymdyqtardyń udaıy ózgeristerge ushyraýy áser etip keledi. Qaptaǵan baǵdarlamalyq qujattar, strategııalar, normalar men usynystardy toltyrýdan dárigerdiń qoly bosamaıdy. Densaýlyq saqtaý salasy bıýrokrattanyp ketti. Azamattar dárigerlerdiń ózderin qaraýdan buryn qaǵazdardy rásimdep, formýlıarlardy toltyrýmen aınalysýǵa májbúr ekenin aıtyp, tań qalady, osyǵan shaǵymdanady. Al damyǵan elderde ornyqty modelder bekitiledi, sosyn baǵdarlamalar men strategııalardy ózgertýge eshkim qulyqty bolmaıdy», - dep atap ótti Senat Tóraǵasy.

Bul rette Q.Toqaev Qazaqstandaǵy densaýlyq saqtaý salasy úshin bir ǵana ońtaıly modelge toqtalatyndaı ýaqyt jetkenin aıtyp, sony tabandy túrde júzege asyrý qajettigin atap ótti.

«Bizde osy jyldary densaýlyq saqtaý mınıstrleri az aýysqan joq. Kelgen ár mınıstr óziniń baǵdarlamasyn usynyp, Parlament depýtattaryn soǵan sendirip, árkim óziniń úlgisi ońtaıly ekenin, synaqtan súrinbeı ótkenin aıtýmen boldy. Alaıda olardyń barlyǵynyń aıaǵy qalaı bolǵany da bárimizge belgili», - dedi Senat Tóraǵasy.

Budan bólek, spıker depýtattarǵa azamattar tarapynan dári-dármek buıymdaryna, onyń sapasyna qatysty kóptegen shaǵymdar túsetinin de alǵa tartty. «Dárihanalar kontrafaktili ónimderge tolyp turǵany da jasyryn emes. Munda memlekettiń retteýshi róli bolmaı otyrǵany da anyq», - dedi Q.Toqaev.