Dárigerler ótemaqysyna qatysty Alekseı Tsoıdy Májiliske shaqyrtty

NUR-SULTAN. QazAqparat – Parlament Májilisiniń tóraǵasy Nurlan Nyǵmatýlın koronavırýsqa shaldyqqan medıtsına qyzmetkerlerine ótemaqy tóleý máselesi Densaýlyq saqtaý mınıstri Alekseı Tsoıdyń qatysýmen qaralatynyn aıtty, dep habarlaıdy QazAqparat tilshisi.

«Bul taqyryp (dárigerlerge tólem jasaý) óte ózekti. Jaqyn arada «Nur Otan» partııasy fraktsııasyna Tsoıdy (Densaýlyq saqtaý mınıstri) jáne basqa memlekettik organdardyń basshylaryn shaqyramyz. Olar osy máselege qatysty esep berýi kerek», - dedi N. Nyǵmatýlın Májilistiń jalpy otyrysynda.

Osy oraıda ol atalǵan máselede Prezıdentiń tikeleı tapsyrmasyn oryndaý nazarǵa alynatynyn jetkizdi.

«Medıtsına qyzmetkerleri óte qıyn jaǵdaıda jumys istedi. Qaýiptiń aldyńǵy shebinde turdy. Keıbireýiniń densaýlyǵy nasharlap, keıbir dárigerler qaıtys boldy. Osy baǵytta dárigerlerdi qoldaý sharalary tıisti deńgeıde oryndalmaǵan. Mınıstrdi shaqyrtyp, «Nur Otan» fraktsııasy osy máselelerdi qarastyrady», - dedi Májilis tóraǵasy.