Dárigerler osyndaı: Qostanaılyq dáriger koronavırýspen qalaı kúres júrgizilgeni týraly aıtyp berdi

Fors-major

-Qaraǵandy medıtsınalyq ýnıversıtetin oıdaǵydaı támamdap, ótken kúzde men, ynta-jigeri mol, ambıtsııasy myqty retinde týǵan jerim - Qostanaı qalasyna oraldym. Jalpy praktıka dárigeri retinde qabyldaý júrgize bastadym. Alaıda mamyr aıynda emhanadaǵy jumysymnan ýaqytsha bas tartýǵa týra keldi. Adamdar aýyryp, qalada karantın bastaldy, emhana janyndaǵy provızor bólimine mamandar qajet boldy. Basshylyq usynys jasap, men oyn qoldap osy jumysqa kelistim. Bul – dárigerge qajetti tájirıbe. Árıne, jaqyndarym úshin alańdap, qoryqtym, sol sebepti de birden olardan oqshaýlandym. Otbasyma rahmet, meniń sheshimimimmen kelisip, qoldaý jasady. Bir-birimizge beıneqońyraý shalyp, sóılesip turamyz, oǵan da etimiz úırenip qaldy.

Keıinnen mobıldi brıgada quramynda shaqyrtýǵa shyǵyp júrdim. Shilde aıynyń basynda jaǵdaı asa aýyr boldy, bir kúnde shalynatyn qońyraý sany myńnan asyp jyǵylatyn. Tańerteńnen keshke deıin jumys tolastamady. Sondaı kúnderdiń birinde, jumystyń sońyna qaraı telefonnan Tobyl qalasynyń juqpaly aýrýlar aýrýhanasynda pnevmonııaǵa shaldyqqan naýqastar kóbeıgeni, jaǵdaı ýshyǵyp, dárigerlerdiń úlgermeı jatqany jaıynda habar keldi. Ýaqyt keshki jeti-segizder shamasy, emhanada men jáne áriptesim ekeýmiz ǵana qalǵan bolatynbyz. Habardy ala sala, osynaý qıyn-qystaý kezeńde, fors-major jaǵdaıyn eskerip, biz birden áriptesterimizge kómekke attandyq.

Soǵysta sııaqty

- Alǵashqy kúnder asa qıyn boldy. Bólim jaqynda ǵana ashylǵan, al oblysta naýqastar sany kún sanap kúrt ósip keledi. Kún ystyq, «Jedel járdem» mashınalary birneshe saǵat qatarynan kezekte turady, ishinde - pnevmonııaǵa shaldyqqan, jaǵdaıy óte aýyr naýqastar.

Olardyń barlyǵyna jedel kómek qajet. Sondyqtan bizge demalyssyz, tańǵy segizden keshki segizge deıin tolassyz jumys isteýge týra keldi. Kúshimiz de azaıa bastaǵan sııaqty. Kúnine 70-ke deıin naýqasty tekserip júrdik. Vırýs aımaqtan aýa almaspaıtyn qorǵanys kıimimen terlep, malmańdaı sý bolyp shyǵatynbyz.

Óz-ózimdi myǵym ustaýǵa ne sebep bolǵanyn bilmeımin, múmkin, jastyq pen ynta, kómek kórsetýge degen qulshynys shyǵar. Bir táýlik boıy aıaǵymnan tik turyp, kezekshiligimdi atqaryp, artynan birneshe saǵat qana demalyp, qaıtadan táýlik boıǵy kezekshilikke shyǵatynmyn. Osyndaı kezde tek moraldyq turǵydan qatty sharshaıtynmyn. Aǵa býyn áriptesterime de aýyr qorǵanys kostıýmin kıip júrý ońaıǵa soqqan joq. Biz qazir soǵysta júrgendeımiz. Tek kórinbeıtin jaý - vırýspen kúresip jatyrmyz. Sońǵy naýqas dertinen aıyǵyp shyqpaıynsha, men de osy statsıonarda bolamyn. Osylaı bul jaǵdaıdy halyqpen birge bastan ótkeremiz. Bul máńgi turatyn jaǵdaı emes bári ózgeredi ǵoı… Dáriger retinde bul jaǵdaı men úshin úlken tájirıbe boldy. Úırengenim kóp.

Kúlimdeıtin kez keldi

- Men patsıentterdiń, bizdi, medıtsına qyzmetkerlerin, túsingenin qalar edim. Biz olardan azbyz, sondyqtan olardyń barlyǵyna birden nazar aýdarý qıyn. Kóptegen aýyr naýqastar boldy, bárin qutqarý múmkin emes edi – jasy ulǵaıǵan, sozylmaly aýrýy barlar, ókpeniń zaqymdanýy 90-95 paıyz bolǵan naýqastar... Biz olardyń árqaısysy úshin qoldan kelgenniń bárin jasadyq jáne áli de jasaýdamyz Biraq vırýs eshkimdi de aıap jatqan joq...

Medıtsınalyq ýnıversıtettiń birinshi kýrsynda oqyp júrgen shaǵymda prorektor, keremet dáriger jáne oqytýshy Vılen Molotov-Lýchanskııdiń «Dáriger - bul salqynqandylyq, meıirimge toly júrek, jyly qol» degen sózderi meniń júregimde máńgi saqtalyp qalǵan edi. Asa bir aýyr kezeńderde (patsıentter ártúrli bolady ǵoı), men únemi ishimnen osy sózderdi qaıtalaımyn. Kez-kelgen jaǵdaıda adam bolyp qalý mańyzdy dep sanaımyn. Bireýge jyly qabaq, meıirimdi sózder, al bireýge qataldyq qajet.

Árıne, patsıentterdiń naýqasynan aıyǵyp, aýrýhanadan shyǵýy dáriger úshin bir ǵanıbet qoı. Olardyń baqyttan bal-bul janǵan júzderin, kúlip, alǵys bildirgenin kórýdiń ózi bir keremet sezim. Olardyń sózderi, shynaı aıtqan tilekteri boımyzǵa kúsh- qýat berip, ózimizdiń qajettiligimizdi sezindiredi. Patsıentter bizdi esterine saqtap qala almaıdy, ádette tanymaıdy da, óıtkeni olarǵa biz qorǵanys kıimin kıip, bastan aıaq tumshalanyp kelemiz. Tek aýrýhanadan shyǵarar ýaqytta, olarǵa usynystar jazylǵan aýrýhana paraǵyn berý úshin jaı maskamen barǵan kezde, olardyń «Dáriger, sizdiń túrińiz osyndaı eken ǵoı!» dep tańqala aıtqan sózin estımin.