Dárigerler ókpeni jeldetý apparattaryn 3 ese qymbat baǵaǵa satyp alǵan

NUR-SULTAN. QazAqparat - Qyzylorda oblystyq densaýlyq saqtaý basqarmasy basshysynyń 2 orynbasary ókpeni jasandy jeldetý apparattaryn 3 ese qymbat baǵaǵa satyp alǵan. Bul týraly QR Sybaılas jemqorlyqqa qarsy is-qımyl agenttigi Parasattylyq departamentiniń dırektory Ǵanıjan Asanuly aıtty, dep habarlaıdy QazAqparat tilshisi.

«Búgingi kúni barlyq óńirlerde medıtsınalyq tehnıkany, onyń ishinde ókpeni jasandy jeldetý apparattaryn satyp alý kezinde sybaılas jemqorlyq jaǵdaılaryna tekserý júrgizilýde. Qazirgi ýaqytta mundaı belgiler birneshe aımaqta anyqtalǵan. Máselen, Qyzylorda oblystyq densaýlyq saqtaý basqarmasy basshysynyń 2 orynbasaryna qatysty árqaısysyn 17,4 mıllıon teńgeden 10 ókpeni jasandy jeldetý apparattaryn satyp alý faktisi boıynsha sotqa deıingi tergeý bastaldy. Apparattar «SK-Farmatsııa» usynǵan baǵadan 3 ese joǵary baǵaǵa satyp alynǵan», - dedi ol agenttiktiń baspasóz qyzmeti alańynda ótken brıfıng barysynda.

Munan bólek, onyń dereginshe, Qostanaı oblystyq sybaılas jemqorlyqqa qarsy qyzmet oblystyq aýrýhananyń laýazymdy tulǵalaryna qatysty sotqa deıingi tergeýdi bastady.

«Olar medıtsınalyq tehnıkany jetkizý týraly shartty seriktestikpen jasap, 181 872 000 teńge kólemindegi qarajatty jymqyrýǵa oqtalý kúdigine ilinip otyr», - dedi departament dırektory.