Dárigerler naýqas balalar úshin fleshmob bıledi
ALMATY. QazAqparat - Almatyda Pedıatrııa jáne balalar hırýrgııasy ǵylymı ortalyǵynda klınıkada em alyp jatqan balalarǵa arnap «Armansyz kúnim bolmaıdy» merekelik sharasy ótti, dep habarlaıdy QazAqparat tilshisi.
Bul sharany «Help Today» qoǵamdyq qory men Pedıatrııa jáne balalar hırýrgııasy ǵylymı ortalyǵy uıymdastyrdy.
Bul aýyr dertke shaldyqqan balalarǵa mereke, qýanysh syılaý, aty jaman aýrýdy jeńýge degen senim uıalatý, kóńilderin kóterý arqyly bir sátke aýrýyn umyttyrý, psıhologııalyq qoldaý kórsetýge baǵyttalǵan.
Pedıatrııa jáne balalar hırýrgııasy ǵylymı ortalyǵynyń basshysy Rıza Boranbaeva men «Help Today» qoǵamdyq qorynyń jetekshisi Elmıra Alıeva balalarǵa jyly tilekterin aıtyp, barsha qaýymdy Balalar kúnimen quttyqtady.
Merekelik kontsertke Parvız Nazarov, Aıdana Medenova, «Talısman» toby, «Tribal Pro» bı toby, Raım men Artýr sııaqty estrada juldyzdary qatysyp, balalarǵa merekelik kóńil-kúı syılady. Óner juldyzdarymen birge ortalyqta em alyp jatqan balalar men olardyń ata-analary óner kórsetti. Sonymen qatar dárigerler de sharadan qalys qalmaı, flesh-mob uıymdastyryp, arnaıy bıin balalarǵa tartý etti.
Shara barysynda ortalyqta em alǵan, aýyr dertti bir emes, eki ret jeńgen, uzaq jáne qıyn joldan ótken Alın Abdýlam sóz sóılep, aýrýmen qalaı kúreskendigi jóninde aıtyp, balalarǵa jaqsylyqqa degen senim tiledi.
Balalar úshin akvagrım men fotosessııalar uıymdastyryldy. «We Art» uıymynyń eriktileri men anımatorlary búldirshinderdiń kóńilin kóterip, balalarmen birlese túrli oıyndar oınady.
Mereke sońynda sharaǵa qatysqan balalar men Sýret baıqaýynyń jeńimpazdary «Help Today» qoǵamdyq qorynyń syılyqtarymen jáne arnaıy dıpomdarymen marapattaldy.
Aıtýly merekemen sonymen qatar «Baýyrjan» qaıyrymdylyq qory quttyqtap, kardıologııa, onkologııa jáne gematologııa bóliminde jatqan barsha balaǵa túrli syılyqtar úlestirip, naýqas balalardyń júzderine qýanysh syılady.
