Dárigerler Mıhael Shýmaherdiń ólim qushqany týraly ósekti joqqa shyǵardy
ASTANA. QazAqparat - 7 maýsym kúni áleýmettik jelilerde «Formýla-1» jarys áleminiń jeti márte jeńimpazy Mıhael Shýmaherdiń qaıtys bolǵany týraly aqparattar paıda bolǵan edi. Nemis sportshysy em qabyldap jatqan frantsýzdyq klınıkanyń dárigerleri bul aqparatty joqqa shyǵardy, dep jazady Vesti.kz.
Eske salaıyq, ótken jyldyń 29 jeltoqsan kúni Shýmaher taý shańǵysymen syrǵanap júrgen kezinde qulap ketip, basyn tasqa soǵyp alǵan soń aýrýhanaǵa jatqyzylǵan bolatyn. Sol ýaqyttan beri ol es-tússiz kúıde jatyr. Al jýyrda «Moskovskıı komsomolets» amerıkandyq anastezıolog ári «Formýla-1» burynǵy dárigeri Gerı Harsteınniń pikirin jarııalady. Onyń aıtýynsha, áıgili shabandozdyń tiri qalýy ekitalaı. «Endi Mıhael Shýmaherdiń densaýlyǵynyń jaqsarǵany týraly jaqsy habar estımiz dep oılamaımyn», - deıdi ol. Alaıda ol sportshynyń jalpy jaı-kúıi jaıly tolyq málimetterden habardar emestigin moıyndady.
