Dárigerler men medbıkelerdiń jalaqysy 30 paıyzǵa deıin kóteriledi – Eljan Birtanov

ShYMKENT. QazAqparat – Kelesi jyldan bastap dárigerlerdiń jalaqysy 30, medbıkelerdiki 20 paıyzǵa kóteriledi. Bul týraly Shymkentke arnaıy saparmen kelgen elimizdiń Densaýlyq saqtaý mınıstri Eljan Birtanov málim etti, dep habarlaıdy QazAqparat tilshisi.

Densaýlyq saqtaý mınıstriniń sózinshe, elimizde medıtsına salasyna bólinetin qarajat kólemi artady. Máselen, bıyl bul salaǵa 1,2 trln teńge bólinse, keler jyly bul qarajat kólemi 1,5 trıllıon teńgeni quraıdy. Sol qarajattar esebinen dárigerler men medbıkelerdiń jalaqysy ósedi. Shymkent qalasyndaǵy sapary kezinde perınataldyq ortalyqtyń jumysymen tanysqan mınıstr bas dárigerge maman tapshylyǵyn joıý úshin, dárigerlerdiń jalaqysyn kóterýdi usyndy.

«Dáriger-reanımatologtyń jalaqysy 300 myń bolsa, bul sommany 600 myńǵa deıin kóterińiz. Qajetsiz shyǵyndardy azaıtyńyz. Sol qarajatty jetispeı jatqan mamandarǵa tóleńiz. Dáriger-reanımatologtardyń jalaqysyn 500-600 myńǵa deıin jetkizý kerek»,- dedi Eljan Birtanov.

Mınıstr sondaı-aq, ana men bala densaýlyǵyn nyǵaıtýǵa arnalǵan birqatar sharanyń barysyna toqtaldy.

Eljan Birtanov perzenthana basshylyǵyna emdeý barysyndaǵy josparlardyń oryndalý barysyn qadaǵalaýdy qatań tapsyrdy.

Aıta keteıik, qalalyq perınataldyq ortalyqta jylyna ortasha eseppen 8 myńǵa tarta sábı dúnıe esigin ashady. Bul perzenthanada kóbine merziminen buryn shaqalaqtar dúnıege keledi. Búginde medıtsınalyq uıymda 400-den asa medıtsınalyq qyzmetker jumys atqarady. Mınıstr sapary barysynda qaladaǵy karıologııalyq ortalyq pen onkologııalyq aýrýhanaǵa da baryp, dárigerlermen kezdesti.

Erkin formatta ótken kezdesýde Eljan Birtanov dárigerlerdiń jumysy onsyz da aýyr ekenin, olardyń jumysyna degen kózqarasty ózgertý kerektigin atap ótti.

Qala basshylyǵyna kópsalaly aýrýhana ashý qajettigin atap ótti. Naýqastarǵa alǵashqy kómek kórsetýge barlyq emdeý mekemeleri jumylyp jumys isteý qajettigin eskertti.