Dárigerler kúlimsirep júrýge kúsh tabady - Taraz qalasynyń turǵyny
TARAZ. QazAqparat - Taraz qalasynyń turǵyny anasyn koronavırýstan emdegen dárigerlerge alǵys aıtty, dep habarlaıdy QazAqparat.
«Oblystyq kópsalaly balalar aýrýhanasy (burynǵy #1 Qalalyq balalar aýrýhanasy) Somatıka bóliminde qyzmet etetin aq halatty abzal jandar - dárigerlerge shyn júrekten alǵys aıtamyn. Dárigerlerdiń meıirimdi qarym-qatynasy jáne anamnyń densaýlyǵyn qalpyna keltirgenderi úshin rahmet», - dep jazdy Taraz qalasynyń turǵyny Sáýle Tursymbekova Instagram paraqshasynda .
Onyń aıtýynsha, anasy Sara Tursumbaeva ІІІ top múgedegi, qan qysymy joǵary adam. Ol 2020 jyly 16 maýsym kúni eki jaqty pnevmonııamen aýyr jaǵdaıda aýrýhanaǵa túsken.
«Anam aýrýhanaǵa túsken kezde ókpesi 32% zaqymdanǵan jáne qan qysymy 150/130, al dene qyzýy 38,8 bolǵan. Osyndaı jaǵdaıda oǵan alǵashqy medıtsınalyq kómek kórsetildi. Aýrýhana ujymy qandaı jaqsy! Bári biri úshin, biri bári úshin eńbek etýde. Tipti qaıda, ne úshin jatqandaryn bilmeıtin aýyr jaǵdaıdaǵy naýqastardyń da tilin tabýda», - deıdi ol.
Taraz qalasynyń turǵyny aq halattaǵy dárigerlerdi perishtege teńedi.
«Erik ózimde bolsa olardyń jalaqysyn birneshe ese kóterer edim. Kúni-túni tynymsyz eńbek etip, ómir úshin kúresýde. Soǵan qaramaı kúlimsirep júrýge kúsh tabady», - deıdi ol.
Ol dárigerler men medpersonaldarǵa, sonyń ishinde bas dárigerdiń orynbasary Qýandyq Ámrequlovqa, dárigerler Erkin Kúzeev, Zýhrp Túrebaeva, Nurbergen Belasarovqa, Birjan Shákenge jáne medbıkeler Sáýle Bekbanova, Kúlpan Qydyrálıeva, Zalına Ibraımova, Lázzat Múlenbaeva, Sholpan Akmatova, Uldana Ábildaeva, Gúlzat Shabdenovaǵa, sanıtarlar Lázzat Úzbaeva, Kenshe Orynalıeva, Natasha Akımova, Gúljan Toǵaıbekova, Lázzat Madımarova jáne Jadyra Kettebekovaǵa úlken alǵys aıtty.
«Uıymshyl, jaýapkershiligi mol ujymǵa shyn kóńilimmen alǵys aıtamyn. Ár naýqasqa meıirim, qamqorlyq tanytqandaryńyz úshin rahmet. Basymdy ıem!», - deıdi ol.
