Dárigerler qudyqqa túsip ýlanyp qalǵan adamdardyń densaýlyǵy týraly aıtty
ALMATY. QazAqparat - Dárigerler Almatydaǵy janarmaı quıý beketiniń qudyǵyna túsip gazben ýlanyp qalǵan adamdardyń densaýlyǵy týraly aıtty, dep habarlaıdy QazAqparat tilshisi.
Qalalyq qoǵamdyq densaýlyq saqtaý basqarmasynyń málimetinshe, 2021 jyldyń 27 sáýirinde Almaty kópsalaly klınıkalyq aýrýhanasynyń jansaqtaý bólimine janarmaı quıý beketinde metan gazynan ýlanǵan úsh adam es-tússiz jaǵdaıda kelip tústi.
«Qazir úsheýi de jansaqtaý bóliminde, esterin jıdy. Dárigerler olardyń jaǵdaıyn aýyr dep baǵalap otyr»,- dep habarlady basqarmadan.
Eske salaıyq, keshe Almatyda janarmaı quıý stantsııasynyń 3 qyzmetkeri eseptegish quraldyń málimetterin bilý úshin qudyqqa túsip, ýlanyp qalǵan bolatyn.
Bul týraly aqparat sonymen qatar Instagram jelisinde de paıda boldy.
