Dárigerler Qostanaıdaǵy avtobýs soǵyp ketken qyzdyń jaǵdaıyn aıtty
QOSTANAI. QazAqparat - Avtobýs soǵyp ketken 15 jasar qyzdyń tórt qabyrǵasy synǵan. Bul týraly oblystyq balalar aýrýhanasynyń bas dárigeri Igor Belobrjıtskıı aıtty, dep habarlaıdy QazAqparat.
Oqıǵa búgin Gashek kóshesiniń boıynda bolǵan. HQKO aıaldamasy mańyndaǵy jaıaý júrginshiler jolaǵynda ótip bara jatqan 15 jasar qyzdy avtobýs qaqqan.
«Qyzǵa jabyq bas súıek-mı jaraqaty, ókpeniń soǵylýy, tórt qabyrǵasy men buǵanasynyń synýy jáne travmatıkalyq shok dıagnozdaryn qoıdyq. Onyń jaǵdaıy aýyr. Áli reanımatsııada jatyr. Soqqy kúshti boldy. Avtobýstyń terezesi synyp ketken», - dedi bas dáriger.
Oblystyq ІІD baspasóz qyzmeti atalǵan derek boıynsha resmı málimdeme jasaǵan joq.
