Dárigerler koronavırýs juqtyrǵan 2 jasar búldirshinniń jaǵdaıy týraly aıtty
ALMATY. QazAqparat – Almatyda koronavırýs juqtyrǵan 2 jastaǵy qyz balanyń jaǵdaıy týraly Qoǵamdyq densaýlyqty saqtaý basqarmasynyń basshysy Tileýhan Ábildaev aıtty, dep habarlaıdy QazAqparat tilshisi.
«Búgin taǵy 3 adamnyń juqtyrǵanyn anyqtadyq. Olardyń biri 2018 jyly týǵan búldirshin balalarǵa arnalǵan juqpaly aýrýlar aýrýhanasynda jatyr. Bala Berlın-Almaty reısimen 13 naýryzda kelgen. Bortta 12 adam bolǵan. Ekıpajben qosa barlyǵy karantınge oqshaýlandy. Balanyń jaǵdaıy qanaǵattanarlyq», - dedi T.Ábildaev brıfıngte.
Juqpaly aýrý juqtyrǵan 2 eresek adam qazir juqpaly aýrýlar aýrýhanasyna jatqyzyldy.
«Qazir Almatyda 11 adamda koronavırýs juqpasy bar ekeni rastaldy. Olardyń barlyǵy DDSU hattamasyna sáıkes, em qabyldap jatyr. Sımptomatıkalyq jáne vırýsqa qarsy terapııa bastaldy. Bul azamattarmen baılanysta bolǵan adamdardyń barlyǵy karantınge jabyldy», - dedi ol.
Aıta ketsek, Almatyda 729 adam karantınde jatyr. Taǵy 760 adam úılerinde oqshaýlanǵan.
Búginde Qazaqstanda koronavırýs juqtyrǵan adam sany 27-ge jetti. Olardyń 16-sy Nur-Sultan qalasynda bolsa, 11-i Almaty turǵyndary.
