Dárigerler kómegimen búkil otbasymyzben naýqastan jazylyp shyqtyq - Qarmaqshy turǵyny
QYZYLORDA. QazAqparat - «Dárigerler - búgingi kúnniń batyrlary deýge ábden laıyq. Medıtsına mamandary óz densaýlyǵyna qaýip tónip turǵanyna qaramastan halyqtyń densaýlyǵy úshin kúresip keledi». Bul - Qyzylorda oblysy Qarmaqshy aýdanynyń turǵyny, zeınetker Tamara Eshmanovanyń júrekjardy lebizi, dep habarlaıdy QazAqparat tilshisi.
Onyń aıtýynsha, aldymen joldasy, balasy men kelini syrqatqa shaldyǵyp, aýrýhanada em alǵan. Ózi úıde 10 kúndeı aýyryp júrgen.
«Asqa tábetim bolmaı, shaıdy ǵana talǵajaý etip júrdim. Sonyń saldarynan aǵzamda álsireý bastaldy. Oǵan qosa aıaq-qolym da uıyp, ábden mazam qashty. Tynysym tarylyp, qalypty densaýlyǵym ózgeshe kúıge tústi. Aýrý ábden maza bermegennen keıin dárigerler kómegine júginýdi jón kórdim. Úıge kelgen jedel járdem dárigerleri meni aýrýhanaǵa alyp ketti. Eki medıtsına mamany aldymen alǵashqy medıtsınalyq kómek kórsetti. Sodan keıin ınfektsııalyq bólimdegi jansaqtaý bólimine jatqyzýǵa sheshim qabyldady. Atalǵan bólim meńgerýshisi Ádilbek Málikov, terapevt-dárigerler Dınara Júsipova, Altynaı Júsipova men Naýryz Qozanov, medbıkeler ár naýqasqa tynym tappaı kómek kórsetti. Bilikti mamandar 4-5 saǵat ishinde densaýlyǵymdy qalpyna keltirdi. Sodan keıin palataǵa aýystyrdy. Bas dáriger Baqytjan Nysanbaev udaıy bólimde emdelip jatqan naýqastardyń jaǵdaıyn surap-bilip júrdi», - deıdi Tamara Eshmanova.
Ol kisi osy ýaqytqa deıin aq halatty abzal jandardyń eńbegi eleýsiz qalyp júrgenin tilge tıek etti. Qazir olar óz densaýlyǵyna qaramastan aýyrǵandardyń amandyǵy úshin kúresip júr.
«Antyna adal dárigerlerdi búgingi kúnniń naǵyz batyrlary desek, ábden jarasady. Baqytjan Nysanbaev basqaratyn aýrýhana ujymyna aıtar alǵysymyz sheksiz. Sol dertińe shıpa tanytqan mamandardyń arqasynda aýyr indetti jeńip shyqtym. Olar qyzmet barysynda em-domnan bólek, psıhologııalyq turǵydan zor kómek kórsetip, ómirge degen qulshynysymyzdy arttyrdy. Búginde otbasymyz túgeldeı jazylyp, úıimizge aman-esen oraldyq. Bul synaqtan da aman-esen óterimizge senim mol», - dedi Tamara Eshmanova.
Sondaı-aq, Qyzylorda oblysynda pnevmonııanyń aýyr túrine shaldyqqan naýqastar sany azaıdy.
