Dárigerler kólik qaǵyp, tastap ketken balanyń jaǵdaıy týraly aıtty
ALMATY. QazAqparat - Almatylyq kásipker, máslıhat depýtaty Qaırat Qudaıbergen aǵash túbinen tabylǵan balanyń jaǵdaıyn bilýge aýrýhanaǵa baryp, dárigerlermen kezdesti, dep habarlaıdy QazAqparat tilshisi.
Belgili bıznesmen bul týraly Feısbýktegi paraqshasynda jazdy.
«Búgin tańerteń saǵat 9-da qalalyq balalar shuǵyl medıtsınalyq járdem ortalyǵyna baryp, belgisiz bireýler kólikpen soǵyp, tal túbine tastap ketken 4 jastaǵy Dinmuhammedtiń jaǵdaıyn bildim. Ata-anasymen kezdestim. Aýrýhananyń bas dárigeri Abaı Zikirııauly Qusaıynov tolyq aqparat aıtty. Dinmuhamedtiń ómiri úshin bilikti dárigerler baryn salýda. Keshe bala úshinshi dárejedegi komada bolǵan, qazir ekinshi dárejege shyqty. Alda eń qıyn 3,5,7-táýlikter kele jatyr. Soqqydan balanyń samaı súıegi ishke kirip ketken. Dárigerler uıyǵan qan men súıek jaryqshaqtaryn tazalady. Biraq soqqydan soń balanyń mıy isine bastady. Bul eń úlken qaýip. Dárigerler baryn salyp jatyr. Qajetti dáriler jetkilikti. Biraq jaǵdaı óte aýyr...», - dedi ol.
Aıta ketý kerek, jantúrshigerlik oqıǵa keshe shyǵys aınalma jolyna jaqyn Brıanskaıa kóshesinde bolǵan. 4 jastaǵy balany kólik qaǵyp, aǵash túbine qaldyryp ketken.
Ata-anasy birneshe mınýt ótken soń ǵana balany júzdegen metr qashyqtan taýyp alǵan.
Almaty polıtsııasy balany soqqandardy izdestirip jatyr. Qazir bul ispen Medeý aýdandyq ІІB janyndaǵy polıtsııa bólimi aınalysýda.
