Dárigerler keńesi: Balalardy juqpaly aýrýlardan qalaı qorǵaý kerek
NUR-SULTAN. QazAqparat – Kúzde jáne qysta respıratorlyq vırýsty ınfektsııalar kúsheıedi. Onyń ishinde aýyr juqpaly aýrý sanalatyn tumaý da bar. Mundaı vırýstardyń kóbi adamnan adamǵa aýa-tamshy jolymen taralady. Búgingi kúni bul aýrýlardyń aldyn alýdyń tıimdi joldary retinde gıgıena men salaýatty ómir saltyn saqtaýdy, densaýlyqty nyǵaıtyp, durys ári teńgerimdi tamaqtaný jolyn jatqyzýǵa bolady. Osy rette medıtsına ǵylymdarynyń doktory, professor, Dári-dármekterdi saraptaý ulttyq ortalyǵynyń sarapshysy Janat Satybaldıeva QazAqparat tilshisine tumaý men JRVI-di juqtyryp almaýdyń joldaryn aıtyp berdi.
Mamannyń aıtýynsha bólmeni jeldetý - aýrýdyń aldyn-alýdyń mańyzdy jáne tıimdi erejeleriniń biri. Bólmeni jıi jáne qarqyndy túrde jeldetip, aýany ylǵaldandyrý qajet. Odan bólek dárigerler ózińizben birge dezınfektsııalyq maılyq pen spreılerdi alyp júrýge keńes beredi.
«Murynnyń shyryshty qabyǵyn baqylańyz, ony álsiz tuzdy eritindimen sýlap, tuzdy eritindimen aýzyńyzdy, tamaǵyńyzdy shaıyńyz. Sý, shyryn túrlerin, shaıdy kóp ishińiz. Biz únemi aıtyp júrgen koronavırýs ınfektsııasynyń aldyn-alý jónindegi barlyq sharalar - JRVI men maýsymdyq tumaýǵa da qatysty. Ol aýrýlarǵa qarsy jyl saıyn ekpe jasalady», - dep eske salady Janat Satybaldıeva.
Sonymen qatar, dárigerdiń pikirinshe, ata-analar mektep oqýshysynyń uıqy rejımi men tamaqtanýyna basa nazar aýdarýy kerek. Taza aýada serýendetýdi de umytpaýy tıis. Bala kúnine kem degende segiz saǵat uıyqtaýy qajet. Óıtkeni onyń uıqysy qanbaı qalsa ımmýnıteti men oqý qabileti nasharlaýy múmkin.
«Balalar tamaqtana otyryp, óz ımmýnıtetin qalyptastyrady. Tamaq teńgerimdi ári nárli bolýy kerek. Zııandy ónimderdiń mólsherin barynsha azaıta bilgen abzal. Jańa pisken kókónister men jemisterdi kóbirek tutynǵan jón, et ónimderin qýyrmaı, qaınatyp, sorpa-sý etken jón. Vıtamındik keshenderdi de umytpaı, balalarǵa psıhıkalyq qysym jasamaý kerek», - deıdi dáriger.
Tumaýdan qorǵaýdyń senimdi ádisi - vaktsınatsııa. Ol tumaý vırýstaryna qarsy turý jolynda ımmýndyq júıeni edáýir yntalandyrady. Vaktsına egilgen kezde denede qorǵanys antıdeneleri paıda bolady, olar naqty vırýspen kezdeskende kúsheıip, ony tez eńseredi.
«Eger, mysaly, adam birneshe jyl boıy jyl saıyn vaktsınatsııa alsa, onda onyń ımmýnıteti únemi sergek bolady. Tumaýǵa qarsy maýsymdyq vaktsınalar óndirýshiler jyl saıyn DDSU usynysy boıynsha shtamm quramyn ózgertedi, óıtkeni epıdemııalyq maýsymda tumaý vırýsynyń ártúrli shtamdary aınalady. Aýyrǵan vaktsınatsııalanǵan adamdar tumaýdy jeńil ótkeredi», - dep atap ótti Janat Satybaldıeva.
