Dárigerler qazaqstandyq «Nık Výıchıchke» aıaq salyp bermek
«Álı úshin ýaıymdap jatqan jandarǵa jaqsy jańalyq bar. Bizdiń Álı aıaqtan tik turyp, júrip ketetin bolady. Qazir bul protsess júrip jatyr. Bizge qajetti somany jınaý qajet. Qorlardyń, ákimniń, halyqtyń kómegimen barlyǵy oıdaǵydaı bolady dep úmittenemin», - dep habarlady Álıdiń anasy Aqmaral QazAqparat tilshisine telefon arqyly.
Ol Álıdiń aıaǵyna protez qoıýdy Ystanbuldaǵy «Ortoport» túrik kompanııasynyń óz moıyndaryna alǵandaryn jetkizdi.
«Biz alǵashqyda Germanııadaǵy klınıkamen baılanystyq. Olar 52 myń eýro bolatynyn aıtty. Keıin bizge Túrkııadaǵy «Ortoport» kompanııasynan usynys tústi. Olar Álıge protezdi 33 myń dollarǵa jasap berýge kelisti. Bizge jeńildik jasaǵandary úshin alǵysymyz sheksiz», - dedi Aqmaral.
Ol iri kompanııalar men qaıyrymdylyq qorlary bas tartqandaryn aıtty. Alaıda, Álıge qol ushyn berýge daıyn qaıyrymdy jandar Qazaqstannan tabylǵan.
«Bul somanyń basym bóligin «Asyl Bala» qory aýdardy. Astana ákimi 4 myń dollar bóldi. Meniń Álıim 1 qyrkúıekte mektepke óz aıaǵymen baryp, qatarlastarymen birge mektep formasyn kıetin bolady», - dedi Aqmaral.
Sondaı-aq, ol bul iske bloger Álııa Sadyrbaevanyń kómekteskenin aıtty.
Budan buryn, Álı Ámirovtiń anasy men onyń otbasy balasy úshin qıyn jolmen júrgenin aıtyp bergen edi. Álı dúnıege kelgende onyń týystary Aqmaraldyń ulynan bas tartýyn suraǵan da eken. Bala óskennen keıin ony kóptegen mektepter qabyldaǵylary kelmegen. Sońynda ol daryndy balalarǵa arnalǵan «Nurorda» mektebine qabyldanyp, qazir sonda bilim alýda.
Eske sala keteıik, aıaqsyz týylǵan astanalyq oqýshy Álı Turǵanbekov belgili orator Nık Výıchıchpen kezdeskendigi týraly buǵan deıin jazǵan bolatynbyz.
Foto: instagram ali_amir_happy