Dárigerler qarda júretin kólik qaqqan bir top aqtóbeliktiń qal-jaǵdaıy týraly aıtty

AQTÓBE. QazAqparat - Kólik qaqqandardyń kishkentaıy bir jarym jasta. Ol aýrýhanada em alyp jatyr. Sonymen birge 5, 16, 17 jastaǵy japa shegýshiler dárigerlerdiń baqylaýyna alyndy, dep habarlaıdy QazAqparat tilshisi.

Aqtóbedegi «Taý» demalys bazasynyń aýmaǵynda oqys oqıǵa boldy. Oblystyq PD baspasóz qyzmetiniń habarlaýynsha, 2007 jyly týǵan aqtóbelik qarda júretin Lynx avtokóligin júrgizip kele jatyp, jabdyqtalǵan qar syrǵymasynyń janynda turǵan bir top adamdy qaǵyp ketti. Oqıǵa saldarynan 40 jastaǵy áıel qaza boldy. Dárigerler balalar aýrýhanasyna túsken naýqastardyń jaǵdaıy týraly habarlady.
«16 jastaǵy qyz jabyq mı jaraqatyn aldy. Oń jaq jambasy zaqymdanǵan. Oń jaq ókpesinen qatty soqqy alǵan. Qazirgi kezde jaǵdaıy aýyr. Naýqas esin biledi. Aýyrsynýdy basatyn dárini qosymsha qabyldap jatyr. Taǵy bir 16 jastaǵy qyzdyń mıy shaıqaldy. Mı jaraqatyn aldy. Esin biledi, jaǵdaıy ortasha aýyr. Al 1,5 jasar ul balanyń jaǵdaıy ortasha aýyr. Onyń da mıy shaıqalǵan. Tynys alýy qalypty. 5 jasar er balanyń basy jaralanǵan. Jaǵdaıy ortasha aýyr. Al 17 jastaǵy bozbala qabyldaý bóliminde em aldy. Onyń jaǵdaıy turaqty»,- dep habarlady oblystyq densaýlyq saqtaý basqarmasynyń basshysy Rústem Isaev.
Al aýrýhanaǵa jetkizilgen 49 jastaǵy er adam týraly málimet ázirge joq.

Foto: Aqtóbe oblystyq PD baspasóz qyzmeti.