Dárigerler ish qurylysy shala jetilip týǵan náresteniń ómirin saqtap qaldy
ASTANA. QazAqparat - Aqmola balalar aýrýhanasynyń dárigerleri ishek-qaryn jolyndaǵy kemistigimen dúnıege kelgen sábıge ota jasady, búgin náreste úıine shyǵarylady, dep habarlaıdy oblystyq densaýlyq saqtaý basqarmasynyń baspasóz qyzmeti.
Náreste 6 sáýir kúni Stepnogorsk aýdanyndaǵy ortalyq aýrýhanada ýaqytyna jetpeı, ishek-qaryn joldarynyń kemistigimen týǵan. Tekserý barysynda sábıdiń aǵzasynda juqpaly aýrýdyń tutas jaıylyp ketkendigi, jatyr ishindegi ınfektsııa jáne tynys alý joldaryndaǵy aýytqýshylyqtary anyqtalǵan.
Sol kúni-aq Stepnogorskige Aqmola balalar aýrýhanasynyń neonotaldyq hırýrgi Ernar Qojabekov pen reanımatolog dárigeri Elena Ivanova jetkizildi. Náresteniń ómirin saqtap qalý úshin jedel ota jasaý kerek boldy. Kúrdeli ota sátti aıaqtaldy, dep habarlaıdy Aqmola oblystyq densaýlyq saqtaý basqarmasy.
«Jas náreste 11 sáýir kúni Aqmola balalar aýrýhanasynyń jansaqtaý bólimshesine jetkizilip, eki apta boıy baqylaýǵa alyndy. Odan keıin jańa týǵan nárestelerdiń patologııasy bólimshesine aýystyryldy. Náreste dúnıege kelgende salmaǵy 2 630 gramm bolsa, qazir 2 890 gramǵa jetti», - deıdi Aqmola balalar aýrýhanasynyń bas dárigeri Serik Aqshalov.
«Náresteme mundaı dıagnoz qoıylady dep oılaǵan joqpyn. Júktilik kezeńi birqalypty ótti. Ýaqytymen dárigerlik tirkeý alyndym, barlyq analızderdi tapsyryp, tekserilip turdym. Ulymnyń ómirin saqtap, otany sátti jasap shyqqan dárigerlerge alǵysymdy bildirgim keledi», - deıdi sábıdiń anasy Evgenııa Akaeva.
