Dárigerler gazdan ýlanǵan «Almaty sý» qyzmetkerlerin qalaı qutqarǵanyn aıtty
ALMATY. QazAqparat – Almatyda dárigerler káriz qudyǵynda ýlanǵan «Almaty sý» kásipornynyń qyzmetkerlerin qalaı aman alyp qalǵanyn aıtyp berdi, dep habarlaıdy QazAqparat tilshisi.
Ýlanǵan jigitter sol kúni №7 qalalyq klınıkalyq aýrýhanaǵa shuǵyl jetkizilgen bolatyn.
Patsıentterdi reanımatolog, travmatolog, neırohırýrg mamandardan turatyn mýltıdıstsıplınarly komanda qarap shyqty.
«Ekeýi de kúkirt sýtekti gazynan ýlanǵan. Ortalyq júıke júıesi zaqymdanǵan. Ýytty entsefalopatııa dıagnozy qoıyldy. Ekeýi de komada jasandy tynys alý apparatyna qosylǵan edi. Jaǵdaılarynyń aýyrlyǵyna baılanysty patsıentter anestezıologııa, reanımatsııa jáne qarqyndy terapııa bólimine jatqyzyldy. Tereń komada jatqan jigitter úshin tek qana úmit etý ǵana qaldy. Dárigerler únsiz ǵana ólim men ómir arasyndaǵy kúreske kiristi. Saýal jibergen BAQ ókilderine de jaýap berý qıyn boldy», - deıdi qalalyq qoǵamdyq densaýlyq basqarmasynyń baspasóz qyzmetinen.
Erteńinde de olardyń jaǵdaıy aýyr boldy. Áli de jasandy tynys alý apparatynda jatty.
Úshinshi táýlik degende patsıentter komadan shyqty. Esin jınap, as iship, ózdiginen sóıleı bastady.
Jaǵdaılary turaqtalǵan soń profıldi bólimshege aýystyryldy.
Qazir olardyń densaýlyǵyn qalpyna keltirýge nevrologııa bóliminiń mamandary atsalysyp jatyr.
8 maýsymda 25 jastaǵy Nurjan aýrýhanadan shyqty.
«Patsıentter jazylyp shyqqanda medıtsınalyq qyzmetkerler úshin odan artyq baqyt joq» deıdi aq halatty abzal jandar.
Nurjan medıtsına qyzmetkerlerine, óziniń qutqarýshysy, Naýryzbaı aýdandyq HQKO qyzmetkeri Erjan Ábdirazaqovqa alǵysyn jaýdyrdy .
Eske sala keteıik, osyǵan deıin Almatyda HQO qyzmetikeriniń káriz qudyǵyna túsip, ýlanyp qalǵan eki azamatty qutqarǵanyn jazǵan bolatynbyz. Kásiporyn osy oqıǵaǵa baılanysty túsinik berdi.
«1 maýsymda «Almaty sý» kásipornynyń qyzmetkerleri kommertsııalyq uıymdardyń sý eseptegish quralyn teksermek bolǵan. Qyzmetkerler qatelesip sýdyń emes, káriz júıesiniń qaqpaǵyn ashyp qaraǵan. Sonyń kesirinen gaz býynan ýlanǵan. Qazir kásiporynda qyzmettik tekserý júrip jatyr. Negizinde «Almaty sý» qyzmetkerleri esepteý quraldarynyń kórsetkishin tirkeýmen ǵana aınalysýy tıis. Qudyqqa túsý olardyń mindetine kirmeıdi», - dep málim etti «Almaty sý» MKK.
