Dárigerler elorda turǵyndaryna úndeý jasady
NUR-SULTAN. QazAqparat – Koronavırýspen kúreste aldyńǵy qatarda júrgen elordanyń medıtsına mamandary qala turǵyndaryn sanıtarlyq-epıdemıologııalyq normalardy saqtaýǵa shaqyrdy, dep habarlaıdy QazAqparat.
Koronavırýspen aýrýhanaǵa túsýshilerdiń kóbeıýin eskere otyryp, medıtsına qyzmetkerleri karantın rejımin saqtaý boıynsha aldyn alý sharalaryn umytpaý kerektigin eske saldy.
«Kúzde naýqas sany az boldy. Keıbiri tipti vırýs toqtady dep oılaǵan bolsa kerek. Biraq ınfektsııa túbegeıli joıylǵan joq. Koronavırýs údep turǵan shaqta kún men túndi aıyra almaǵan kezimiz boldy. Ýaqytqa qarap, qaı shaqta jumys isteýimiz kerektigin oılaǵan joqpyz. Koronavırýstyń kúrt órshýi men taralýynyń qaıtalanýyna jol bermeýimiz kerek. Keıbiri qala ishin betperdesiz aralap, sanıtarlyq normalardy elemeı jatqandary bar. Al biz munda kún saıyn naýqastardyń densaýlyǵy men ómiri úshin kúresip júrmiz», - deıdi qalalyq juqpaly aýrýlar ortalyǵynyń dárigeri.
Statsıonarda koronavırýstan emdelip jatqan Áıgerim Ómirjanova aýrýhana tósegine tańylatynyna senbegenin aıtady.
«Bul qaýipti vırýstyń elimizge zııan tıgizgenine bir jylǵa jýyq ýaqyt boldy. Osy ýaqyt ishinde men alańsyz júrip, densaýlyǵym týraly oılaǵan emespin, vırýs joq dep te oıladym. Biraq ózimdi nashar sezingen sátten bastap, birden medıtsınalyq kómekke júgindim. Ókinishke qaraı, menen koronavırýs shyqty. Shynymdy aıtsam, mundaı jaǵdaıǵa tap bolamyn dep oılamaǵan edim. Bul eshqandaı da ázil emes eken», - dedi A.Ómirjanova.
Esterińizge sala keteıik, qalada birqatar karantındik shekteý sharalary engizilgen. Qala turǵyndary maska rejımin, áleýmettik qashyqtyqty saqtaýy, qoldaryn antıseptıkpen óńdeýi qajet.
Sońǵy bir táýlikte Nur-Sultanda koronavırýstyń 91 jaǵdaıy tirkeldi. Jalpy, pandemııa bastalǵaly indet 21 576 adamnan anyqtaldy. Koronavırýstyń taralý qaýpi boıynsha elorda «qyzyl» aımaqta tur.
