Dárigerler Elbasy Joldaýynda ózderin umytpaǵanyna qýanyshty
ALMATY. Qańtardyń 30-y. QazAqparat /Elena Ilınskaıa/ - Dárigerler Elbasy Joldaýynda ózderin umytpaǵanyna: jalaqyny shildeden bastap emes, sáýir aıynan kóterýge ýáde bergenine, densaýlyq saqtaý salasynyń jetistikterine toqtalyp, ólim-jitimdi azaıtý, qazaqstandyqtardyń salaýattylyǵyn jaqsartý sııaqty naqty mindetter qoıǵanyna qýanyp otyr.
Elbasynyń «Jańa onjyldyq - Jańa ekonomıkalyq órleý - Qazaqstannyń jańa múmkindikteri» atty Joldaýyna túsindirme bergen Almaty qalasynyń Salaýatty ómir salty ortalyǵy dırektorynyń orynbasary Gúljahan Kárimova osylaı dedi.
«100 mektep, 100 aýrýhana» baǵdarlamasy boıynsha ashylyp jatqan aýrýhanalar men emhanalardyń qala turǵyndaryna úlken jaǵdaı jasap jatqanyn atap kórsetti. «Bizde alty perzenthana bar, bul qalamyz úshin azdaý, sondyqtan da jaqynda Almatydaǵy ashylatyn Elbasy aıtqan jańa perınataldyq ortalyq bizge qajet-aq. Ol jańa týǵan nárestelerdiń shetineý kórsetkishterin qysqartýǵa jáne qazaqstandyq áıelderdiń ómirlerin uzartýǵa kómektesetin bolady», deıdi G.Kárimova. Mamannyń aıtýynsha, 2009 jyly ana men bala ólimi, aldyńǵy jylǵa qaraǵanda, 0,4-0,5 paıyzǵa tómendegen.
K.Kárimova hanym, Almaty qalasynyń Salaýatty ómir salty ortalyǵynyń aǵymdaǵy jyl boıy Joldaý júktegen mindetter boıynsha jumys isteıtinin aıtty. «Elbasy aıtqan salaýatty ómir salty - bizdiń turaqty qyzmetimiz. Biz barlyq 16 baǵdarlamany, onyń ishinde «Temekige qarsy», «Qorshaǵan orta», «Durys tamaqtaný jáne salmaqty azaıtý» jáne t.b. baǵdarlamalaryn jalǵastyramyz» deıdi G.Kárimova.
