Dárigerler efırde qandaı da bir preparattardyń ataýyn jarııalaǵanǵa qarsymyn - Mahabbat Bekbosynova

NUR-SULTAN. QazAqparat – «Ulttyq ǵylymı kardıohırýrgııa ortalyǵy» AQ basqarmasy tóraǵasynyń mindetin atqarýshy Mahabbat Bekbosynova koronavırýsqa qarsy dárilik preparattardy tek dárigerler taǵaıyndaýy kerektigin aıtty, dep habarlaıdy QazAqparat tilshisi.

Onlaın rejımde ótken baspasóz máslıhatynda indet taralǵan kezde klınıkalyq hattamalarǵa antıkoagýlıanttar engizilgenin, alaıda el halqy osy preparattardy dárihanalardan jappaı satyp alýǵa talpynǵany aıtyldy. «Preparattardy eshbir júıesiz túrde alýdyń saldary qandaı bolady?», - dep surady tilshiler.

«Dárigerler efırde qandaı da bir preparattardyń ataýyn jarııalaǵanǵa qarsymyn. Sebebi muny halyq durys qabyldamaıtyn jaǵdaılar kezdesedi. Bizdiń suhbattarymyzdy tyńdap alyp, adamdar dárihanaǵa baryp, preparattardy satyp alady. Jalpy, dárilik preparattar tek retsept boıynsha satylýy kerek. Árıne, maýsym-shilde aılarynda obektıvti jaǵdaı boldy, sol kezde adamdar jaqyndarynyń densaýlyǵy úshin jan-jaqtan dári izdedi. Jaz kezinde preparattardyń tapshylyǵy sezilgen edi. Degenmen, kez kelgen dárilik preparattar tek dárigerdiń ruqsatymen berilgeni durys», - dedi M. Bekbosynova.

Onyń sózine qaraǵanda, koronavırýstan emdeý kezinde qandy suıyltatyn preparattardyń túrli sanattary bar.

«Naýqas aspırınniń ústine antıkoagýlıanttardy qabyldaǵan jáne bul jaǵdaıda adamdar medıtsınalyq nusqaýlardy eskermegen. Osy oraıda bizge qan toqtamaýdyń túrli jaǵdaıymen patsıentter kelip jatty. Adamdar medıtsınalyq mekemege júgingen kezde, osynyń saldaryn túzeýge bolatynyn aıtqym keledi. Eger bul preparattardy eshbir qadaǵalaýsyz qabyldaı berse, onda ólim jaǵdaıyna da alyp kelýi múmkin», - dedi dáriger.