Dárigerler: Ebola vırýsy aýa arqyly juǵýy múmkin
ASTANA. QazAqparat - Álemdik ǵalymdar alańdaýshylyq bildirýde: Afrıkadaǵy osy jolǵy ebolanyń paıda bolýy kúlli álemge qaýip ákelýi múmkin. Vırýs teorııa boıynsha mýtatsııalanýǵa qabiletti. Eger solaı bolǵan jaǵdaıda, indet aýa-tamshy joldary arqyly da juǵýy múmkin.
Búginde indetten Batys Afrıkada 2300 adam qaza taýyp, 4300-den astam syrqattandy. Munyń bári jarty jylda bolǵan. Bul jolǵy epıdemııa Ebola paıda bolǵan 1976 jyldan bergi eń qaýiptisi sanalýda.
Dúnıejúzilik densaýlyq saqtaý uıymy ókilderi qazanda apta saıyn indetti juqtyrǵandar sany birneshe myńǵa artýy múmkin dep dabyl qaǵýda. Ebola vırýsynan 15 el qatty zardap shegedi, bul 22 mıllıon adamnyń ómirine qaýip tóndiredi, dep habarlady Meddaily.
2012 jyly kanadalyq ǵalymdar: shoshqalar men maımyldardyń tynys alý júıesi arqyly taralýy múmkin ekenin anyqtaǵan bolatyn. Olardyń ókpesi adamdardikine uqsas. Aýrý belgileri 21 kún ishinde paıda bolady. Juqtyrǵandardy dereý taýyp, oqshaýlaý ońaı sharýa emes. Al vırýs ókpege juǵatyn bolsa, Eboladan ólim-jitim 90 paıyzǵa jetedi, dep jazady rosbalt.ru.
